Nandurbar : मृत लिपिकाच्या नावे बनावट व्हाऊचर तयार केले, खोट्या स्वाक्षरीही केल्या; लाखोंचा घोटाळा करणाऱ्या अधिकाऱ्यांना बेड्या

नंदुरबारमधील नवापूर तालुका कृषी अधिकारी कार्यालयात तब्बल २० लाख ५० हजार १४८ रुपयांचा मोठा आर्थिक घोटाळा उघडकीस आला आहे. या प्रकरणात तत्कालीन तालुका कृषी अधिकारी तथा निवृत्त कृषी उपसंचालक वसंत धर्मराज चौधरी आणि कर सल्लागार राकेश भालचंद्र कोठावदे यांनी संगनमताने वस्तू व सेवा कर (GST) रकमेचा अपहार केल्याचे तपासात स्पष्ट झाले आहे. या दोघांविरुद्ध नवापूर पोलीस ठाण्यात गुन्हा दाखल करण्यात आला असून, राकेश कोठावदे याला अटकही करण्यात आली आहे. या प्रकरणाने प्रशासनात खळबळ उडाली आहे.

मिळालेल्या माहितीनुसार, सन २०१८ ते २०२० या कालावधीत वसंत चौधरी हे नवापूर तालुका कृषी अधिकारी म्हणून कार्यरत होते. त्या काळात मृद व जलसंधारण योजनेअंतर्गत विविध कामे करण्यात आली होती. या कामांवर शासन नियमानुसार जीएसटी भरणे आवश्यक होते. त्यासाठी वसंत चौधरी यांनी राकेश कोठावदे यांच्याकडे सुमारे ३० लाख ३३ हजार १७० रुपयांचा धनादेश सुपूर्द केला. मात्र, राकेश कोठावदे याने यापैकी केवळ ९ लाख ८३ हजार ०२२ रुपयेच ई-पेमेंटद्वारे शासनाकडे जमा केले. उर्वरित २० लाख ५० हजार १४८ रुपये वंसत चौधरी आणि राकेश कोठावदे यांनी संगनमताने अपहार करून स्वतःच्या फायद्यासाठी वापरले.

हा घोटाळा लपवण्यासाठी आरोपींनी अत्यंत चुकीचा मार्ग अवलंबला. कार्यालयातील मयत लिपिक किरण झिंगा कन्हैय्या यांच्या नावाने बनावट व्हाऊचर तयार करण्यात आले. त्या व्हाऊचरवर संबंधित रक्कम परत दिल्याचे दाखवण्यात आले. इतकेच नव्हे तर, त्या कागदपत्रांवर मयत व्यक्तीच्या खोट्या स्वाक्षऱ्याही करण्यात आल्या. तपासात हे व्हाऊचर पूर्णपणे बनावट असल्याचे उघड झाले असून, या प्रकारामुळे गुन्ह्याची गंभीरता अधिकच वाढली आहे.

या प्रकरणी सध्याचे तालुका कृषी अधिकारी रविशंकर गेमसिंग पाडवी यांनी तक्रार दिल्यानंतर नवापूर पोलीस ठाण्यात गुन्हा दाखल करण्यात आला. पोलीस निरीक्षक अभिषेक दिलीप पाटील आणि पोलीस उपनिरीक्षक अभिजित किशोर अहिरे यांनी तत्काळ कारवाई करत तपास सुरू केला आहे. भारतीय दंड संहितेतील विश्वासघात, फसवणूक, बनावट कागदपत्रे तयार करणे आणि संगनमत या गंभीर कलमान्वये गुन्हा नोंदवण्यात आला असून, पुढील तपास पोलीस उपनिरीक्षक अभिजित अहिरे करत आहेत. शासकीय निधीच्या सुरक्षिततेची जबाबदारी असलेल्या अधिकाऱ्यांनीच असा घोटाळा केल्यामुळे प्रशासनात मोठी खळबळ उडाली आहे. या प्रकरणातील दोषींवर कठोर कारवाई होणार का, आणि या घोटाळ्यामागे आणखी कोणाचा हात आहे का, याकडे आता सर्वांचे लक्ष लागले आहे.