Nanded News : भावकीतील लोकांकडून मारण्याची धमकी, आरोपाचा व्हिडीओ करत तरुणाने आयुष्य संपवलं!

संजय सूर्यवंशी
नांदेड : किरकोळ कारणावरून भावकीच्या लोकांनी शिविगाळ करुन मारण्याची धमकी दिली. असा आरोप करत नांदेडच्या नायगाव तालुक्यातील निळेगव्हाण येथील वीस वर्षीय तरुणाने आत्महत्या केल्याची घटना घडली आहे. आत्महत्या करण्यापूर्वी त्याने व्हिडीओ केला आहे. 

नायगाव तालुक्यातील निळेगव्हाण येथील श्याम यशवंत जाधव (वय २०) असे आत्महत्या करणाऱ्या तरुणाचे नाव आहे. (Nanded) या तरुणाने व्हिडीओ तयार करुन आणि धमकी देणाऱ्यांचे नावे घेवून कुष्णूर येथील तलावात उडी मारुन आत्महत्या केल्याची घटना मंगळवारी उघडकीस आली. घटनेबाबत कुटुंबियांना माहिती मिळाल्यानंतर त्यांनी लागलीच घटनास्थळी धाव घेतली. तसेच याबाबत पोलिसांनी माहिती दिल्यानंतर कुंटूर पोलिस (Police) दाखल होऊन तपास सुरु केला आहे. 

दरम्यान व्हिडिओ करून श्याम जाधव यांनी काही लोकांवर आरोप केले आहेत. मला मारण्याची धमकी देण्यात आली आहे. मी मारहाण सहन करू शकत नाही म्हणून जीव द्यायला जात आहे असं व्हिडिओमध्ये त्याने म्हटलं आहे. यामध्ये काही जणांची त्याने नावे घेतली असल्याने पोलिसांकडून त्या दृष्टीने तपास सुरु आहे.