Farmer Success Story : आयुर्वेदिक वन औषधी पिक लागवडीतून लाखो रुपयांची कमाई; नांदेडच्या शेतकऱ्याचा यशस्वी प्रयोग

संजय सूर्यवंशी 
नांदेड : पारंपरिक शेती करण्याऐवजी शेतीत नवनवीन प्रयोग केल्यास शेती किती फायदेशीर असते; याचं उदाहरण नांदेडच्या एका शेतकऱ्याने दाखवून दिले आहे. पारंपरिक पद्धतीने पिकांची लागवड न करता आयुर्वेदीक वन औषधीसाठी उपयुक्त असलेल्या पिकांची लागवड करण्याचा जुगार शेतकऱ्याने खेळला. या प्रयोग यशस्वी झाला असून शेतकऱ्याला यातून लाखो रुपयांचे उत्पन्न मिळत आहे. 

नांदेडच्या मुदखेड तालुक्यातील डोंगरगाव येथील बालाजी महादवाड या शेतकऱ्याने हा प्रयोग यशस्वी केला आहे. या शेतकऱ्याने आपल्या अकरा एकर शेतीमध्ये विविध प्रकारच्या आयुर्वेदिक वनौषधी पिकांची लागवड केली आहे. बालाजी महादवाड यांनी मागील वर्षांपासून या पीक लागवडीचा यशवी प्रयोग केला आहे. अकरा एकरमध्ये अमेरिकन चिया, अश्वगंधा, इटालियन तुळस, कलवंजी इसमगोल्ड, अजवाइन अशा प्रकारच्या सहा वनौषधी पिकांची लागवड करण्यात आली आहे. 

खर्च जाऊन २५ लाखांचा नफा 

पिकांच्या लागवडीसाठी महादवाड यांना ३० हजार रुपय खर्च आला. सध्या हे पीक काढणीला आले असून या पिकाच्या माध्यमातून खर्च वागळता २५ लाख रुपये उत्पन्न मिळणार असल्याचे महादवाड या शेतकऱ्याने सांगितले. पारंपरिक शेतीला बगल देत शेतीत नवनवीन प्रयोग करत पिकांची लागवड केल्यास शेतकऱ्यांना आर्थिक फायदा होतो. 

अन्य शेतकऱ्यांनीही टाकले पाऊल 

त्यांच्या या यशवी प्रयोगाकडे पाहून अनेकांना प्रोत्साहन मिळाले आहे. यातूनच डोंगरगाव येथील अनेक शेतकऱ्यांनी आयुर्वेदिक वनौषधी पिकांची लागवड केली आहे. त्यामुळे नांदेड जिल्ह्यातील इतरही शेतकऱ्यांनी आयुर्वेदिक वनौषधी पिकांची लागवड करून आपली आर्थिक उन्नती करावी असे आवाहन बालाजी महादवाड या शेतकऱ्याने केले आहे.