Rasta Roko : शेतकरी कर्जमाफीसाठी प्रहार संघटना आक्रमक; राज्यात ठिकठिकाणी केला चक्काजाम, शेतकरीही उतरले रस्त्यावर

Prahar Rasta Roko : शेतकऱ्यांच्या संपूर्ण कर्जमाफी देण्यात यावी; या प्रमुख मागणीसाठी आज राज्यभर प्रहार संघटनेकडून आंदोलनाचा इशारा देण्यात आलेला आहे. त्याच अनुषंगाने राज्यातील अनेक शहरांमध्ये प्रहार संघटनेच्या कार्यकर्त्यांसोबत शेतकरी देखील रस्त्यावर उतरला आहे. ठिकठिकाणी चक्काजाम आंदोलन करण्यात येत आहे. यात नांदेड, नाशिक, अमरावती, वाशीम, शिर्डी, नगर याठिकाणी रास्ता रोको करण्यात आला आहे. 

नांदेड- नागपूर महामार्ग रोखला

नांदेड : नांदेड जिल्ह्यात देखील प्रहार संघटना आक्रमक झाली असून नांदेड- नागपूर राष्टीय महामार्गावर शेतकऱ्यांनी रास्ता रोको आंदोलन सुरु केले आहे. शेतकरी कर्जमाफीसह इतर मागण्यासाठी शेतकरी आक्रमक झाले असून शेतकऱ्यांनी दोन तासापासून नांदेड नागपूर राष्ट्रीय महामार्ग रोखून धरला आहे. परिणामी आंदोलनामुळे वाहनाच्या लांबच लांब रांगा लागलेल्या आहेत. 

नाशिकच्या मेहर सिंगल येथे चक्काजाम
नाशिक : शेतकऱ्यांच्या संपूर्ण कर्जमाफीसाठी प्रहार संघटनेकडून नाशिकच्या मेहेर सिग्नल या ठिकाणी आंदोलन करण्यात येत आहे. तसेच कृषिमंत्री माणिकराव कोकाटे यांचा सभागृहातील रमी खेळतानाचा व्हिडिओ समोर आल्यानंतर कोकाट्यांच्या राजीनाम्याची मागणी देखील जोर धरत आहे. नाशिक शहरात प्रहार संघटनेकडून शेतकऱ्यांची कर्जमाफी आणि माणिकराव कोकाटे यांचा राजीनामा या दोन प्रमुख मागण्या घेऊन चक्काजाम आंदोलन केले जात आहे. बॅनर हातात घेऊन प्रहार संघटनेच्या कार्यकर्त्यांकडून जोरदार घोषणाबाजी केली जात आहे. 

नाशिक-संभाजीनगर महामार्ग रोखला 
नाशिक : शेतकऱ्यांना कर्जमाफी, हमीभाव, दिव्यांगांना ६ हजार रुपये मानधन या प्रमुख मागण्यांसाठी प्रहार जनशक्ती पक्षाचे अध्यक्ष बच्चू कडू यांनी राज्यव्यापी चक्काजाम आंदोलनाची घोषणा केली आहे. त्यानुसार राज्यात ठीक ठिकाणी आज प्रहार जनशक्ती पक्षाच्या वतीने चक्काजाम आंदोलन करण्यात येत आहे. या पार्श्वभूमीवर नाशिकच्या येवल्यात देखील नाशिक- संभाजीनगर महामार्गावर रस्ता रोको आंदोलन केले. सुमारे एक तास हे चक्काजाम आंदोलन सुरू होते. आंदोलनामुळे महामार्गावर दुतर्फा वाहनांच्या लांबच लांब रांगा लागल्या. 

वाशिममध्ये प्रहारच्या वतीने रास्ता रोको आंदोलन
वाशीम : वाशिममध्ये प्रहार जनशक्ती पक्षाच्या वतीने शहरातील पुसद नाका येथे रास्तारोको आंदोलन करण्यात आले. शेतकरी कर्जमाफी, शेतमजूर, दिव्यांग, मेंढपाळ आणि मच्छीमार यांच्या विविध मांगण्यासाठी आंदोलन करण्यात आले. यावेळी अकोला –हैद्राबाद मार्गावर हे आंदोलन करण्यात आलं. जवळपास अर्धा तास चाललेल्या आंदोलनामुळे वाहतूक खोळंबली होती. 

कर्जमाफीसाठी प्रहारचा रस्त्यावर एल्गार

शिर्डी (अहिल्यानगर) : शिर्डी शहरात नगर- मनमाड महामार्गावर रास्ता रोको आंदोलन करण्यात येत आहे. शेतकरी कर्जमाफी आणि विविध मागण्यांसाठी प्रहारचे कार्यकर्ते रस्त्यावर उतरले आहेत. प्रहारच्या आंदोलनाला महाविकास आघाडी, महाराष्ट्र नवनिर्माण सेना, लोक स्वराज्य आंदोलन आणि इतर विविध संघटनांचा पाठिंबा दिला आहे. आंदोलकांनी नगर- मनमाड महामार्ग अडवला असून महायुती सरकार आणि कृषीमंत्र्यांच्या विरोधात जोरदार घोषणाबाजी करण्यात आली.