Nanded: अपघाती निधन झालेल्या तरुणाच्या कुटुंबीयांना गावकऱ्यांचा आधार; व्हॉट्सअ‍ॅप ग्रुपच्या माध्यमातून जमा केले १ लाख ४३ हजार

सध्याच्या जगात कधी काय होईल, हे सांगता येत नाही. त्यामुळे प्रत्येकाने आपलं आयुष्य मनमोकळेपणाने जगावं, असं म्हणतात. दिवसाला अनेक अपघात होतात. त्यात कित्येक लोकांचे जीव जातात. त्यांच्या कुटुंबाचे झालेले नुकसान तर आपण भरुन काढू शकत नाही. परंतु आपण त्यांना आर्थिक मदत तर करुच शकतो. असंच काहीसं नांदेडच्या एका गावातील नागरिकांनी केलं आहे.

अपघातात निधन झालेल्या तरुणाच्या कुटुंबीयांना गावकऱ्यांनी आधार दिला. नांदेडच्या धर्माबाद तालुक्यातील सालेगाव येथील उत्तम क्षीरसागर या तरुणाचे काही दिवसापूर्वीच बस अपघातात निधन झाले.उत्तम क्षीरसागर या तरुणाचे अपघातात निधन झाल्यानंतर सालेगाव येथील छत्रपती संभाजी राजे या व्हाट्सअप ग्रुपच्या मित्र मंडळांनी तरुणाच्या कुटुंबीयांना आर्थिक मदत करण्याचे आवाहन ग्रुपच्या माध्यमातून केले.

काही तासातच छत्रपती संभाजी राजे या व्हॉट्सअप ग्रुप वर एक लाख 43 हजार 600 रुपयाची रक्कम जमा झाली. अपघातात निधन झालेल्या उत्तम क्षीरसागर या तरुणाला आई-वडील पत्नी आणि एक वर्षाची मुलगी आहे. घरातील सर्वात लहान आणि कमावता तरुण गेल्याने कुटुंबावर दुःखाचा डोंगर कोसळला.

दरम्यान, त्याच्या नक्षत्रा या एका वर्षाच्या मुलीच्या नावाने 01 लाख 40 हजार रुपये रक्कम जमा झाली. याचा गावकऱ्यांनी विमा काढला. मुलीच्या नावाने विमा काढून गावकऱ्यांनी सामाजिक बांधिलकी जोपासली. या उपक्रमाचे सर्वत्र कौतुक होत आहे. असंच जर सर्वांनी आपल्यावतीने थोडी मदत जरी केली तरी अनेक कुटुंबाना आधार मिळेल.