फी न भरल्याने मुख्याध्यापकाने पाचवीतल्या मुलाला शाळेतून काढलं, पालकांच्या व्हॉट्सअ‍ॅपवर पाठवला शाळा सोडल्याचा दाखला

पराग ढोबळे, साम टीव्ही, प्रतिनिधी

नागपूरमध्ये एक धक्कादायक घटना घडली आहे. शाळेची फी न भरल्याने एका विद्यार्थ्याला मुख्याध्यापकाने शाळेतून बाहेर काढले. पाचवीत शिकणाऱ्या मुलाच्या पालकाच्या व्हॉट्सअ‍ॅपवर मुख्याध्यापकाने शाळा सोडल्याचा दाखला पाठवला. मुख्याध्यापकाने पाचव्या वर्गाचा निकाल रोखून धरल्याचा आरोप विद्यार्थ्याच्या वडिलांनी केला आहे. नागपूरच्या कोंढाळी येथील लाटखोटीया शाळेत हा प्रकार घडला आहे.

मिळालेल्या माहितीनुसार, मोहम्मद असे पाचवीमध्ये शिकणाऱ्या मुलाचे नाव आहे. चौथ्या वर्गाची फी न भरल्याने मुख्याध्यापकाने माझ्या मुलाचा शाळा सोडल्याचा दावा दिल्याचे मोहम्मगचे वडील अब्दुल खकिल शेख यांनी म्हटले आहे. आम्ही पाचव्या वर्गाची फी सुद्धा भरली आहे. चौथ्या वर्गाची फी बाकी आहे. त्यामुळे सहाव्या वर्गात प्रवेश न देता शाळा सोडल्याचा दाखला पालकाच्या व्हॉट्सअ‍ॅपवर पाठवण्यात आल्याचा दावा अब्दुल खकिल शेख यांनी केला आहे.

शाळेत आर टी अंतर्गत मोठ्या प्रमाणात घोटाळा करण्यात आला होता, त्या संदर्भातल्या तक्रारी पालक म्हणून आम्ही शिक्षण विभागाकडे केली होती. याचा वचपा काढण्यासाठी मुलाला शाळा सोडल्याचा दाखला दिल्याचा आरोप मुलाच्या वडिलांनी केला आहे. शिक्षण अधिकाऱ्यांकडे लेखी तक्रार केली आहे. महाराष्ट्र राज्य बाल हक्क संरक्षण, मुख्यमंत्री सचिवालय यांना इमेलद्वारे तक्रार करुन आम्ही न्याय देण्याची मागणी केली आहे, अशी माहिती अब्दुल खकिल शेख यांनी केले आहे.

शाळेची फी भरण्यास विलंब केल्याने पाचव्या वर्गात शिकणाऱ्या मुलाला शाळा सोडल्याचा दाखला व्हॉट्सअ‍ॅपवर पाठवला. निकाल रोखून आम्हाला त्रास दिला जात आहे असे मुलाच्या वडिलांनी म्हटले आहे. शाळेच्या संदर्भात तक्रार केल्याने वचपा काढण्यासाठी हा प्रकार सुरु असल्याचा दावा मुलाच्या वडिलांनी केला आहे.