Nagpur Crime : पोलिसाची तलावात उडी मारून आत्महत्या, नागपूर पोलिस दलात खळबळ; धक्कादायक कारण समोर

Nagpur Police Constable Shilratna Belekar Sucide In Ambazari Lake नागपूरमधून धक्कादायक बातमी समोर आली आहे. एका पोलीस कॉन्स्टेबलने सोमवारी रात्री अंबाझरी तलावात उडी घेऊन आत्महत्या केली. पत्नी सोबत सुरू असलेल्या कौटुंबिक वादातून नैराश्यात आलेल्या कारणातून त्यांनी हे टोकाचं पाऊल उचललं असल्याचे समोर आले आहे. याप्रकरणी पोलीस पुढील तपास करत असून मृतदेह शवविच्छेदनासाठी पाठवण्यात आला आहे.

मिळालेल्या माहितीनुसार, शिलरत्न भीमराव बेलेकर( वय ४५) असे मृत हवलदार यांचे नाव आहे. अलीकडेच काही महिन्यांपूर्वीच हिंगणा पोलीस ठाण्यातून त्यांची बदली होऊन प्रतापनगर पोलीस ठाण्यात झाली होती. शिलरत्न यांचा पत्नीशी गेल्या दोन वर्षांपासून कौटुंबिक वाद सुरू होता. त्यामुळे ते दोन्ही मुलांसह इसासनी भागातल्या वडिलोपार्जित घरी रहात होते. त्यांचा एक मुलगा आठवीत तर दुसरी मुलगी चौथीच्या वर्गात शिकते.

गेल्या काही दिवसांपासून पत्नी मुलांचा ताबा मागत असल्याने शिलरत्न नैराश्यात आले होते. १९ फेब्रुवारीपासून ते पोलीस ठाण्यात गैरहजर होते. ते घरी देखील आले नव्हते त्यांच्या भावाने २२ फेब्रुवारीला शिलरत्न बेपत्ता झाल्याची तक्रार प्रतापनगर पोलिस ठाण्यात दिली होती. दरम्यान मंगळवारी सकाळी अंबाझरी तलावात पोहत असलेल्या काही तरुणांना एक मृतदेह दिसला. त्यांनी त्याची माहिती पोलिसांना दिली.

पोलिसांनी घटनास्थळ गाठत मृतदेह तलावाबाहेर काढून तपासणी केली असता त्यात शिलरत्नचे ओळखपत्र सापडले. अंबाझरी पोलिसांनी मृतदेह शवविच्छेदनासाठी मेडिकलला रवाना केला. दरम्यान शिलरत्न यांच्या जाण्याने त्यांच्या कुटुंबीयांवर दुःखाचा डोंगर कोसळला आहे. तसेच त्यांची मुलं वडिलांच्या मायेला पोरकी झाली आहेत.