Nagpur Medical Collage : लहान मुलांच्या अतिदक्षता विभागात शिरले घाण पाणी; नागपूरच्या मेडिकल रुग्णालयातील प्रकार

पराग ढोबळे 

नागपूर : नागपूरच्या शासकीय मेडिकल रुग्णालयात असलेल्या लहान मुलांच्या अतिदक्षता विभागात बाथरूमचे घाण पाणी शिरल्याचा धक्कादायक प्रकार उघडकीस आला. या वार्डात २६ बालक उपचारासाठी दाखल असताना हा प्रकार घडल्याने रुग्णालयात एकच खळबळ उडाली. यानंतर प्रशासन खळबळून जागे झाले असून हे पाणी काढण्याचे काम सुरु करण्यात आले होते.  

नागपूरच्या शासकीय मेडिकल कॉलेजमध्ये मोठ्या संख्येने रुग्ण उपचारासाठी येत असतात. तर या रुग्णालयात लहान मुलांवर उपचार करण्यासाठी स्वतंत्र वार्ड असून या वॉर्डमध्ये २६ चिमुकले उपचारासाठी दाखल होते. असे असताना अतिदक्षता विभागात घाण पाणी शिरले. अगोदरच लहान मुलांवर उपचार सुरु असताना त्यांच्या आरोग्याची दक्षता पूर्णपणे घेतली जात असून या प्रकारामुळे चिमुकल्याचा आरोग्याचा प्रश्न निर्माण झाला होता. 

नूतनीकरणाचे काम संथ गतीने 

दरम्यान सार्वजनिक बांधकाम विभागाकडून मेडिकलमधील काही वॉर्डचे नूतनीकरण करण्याचे काम सुरू आहे. साधारण मागील नऊ महिन्यापेक्षा अधिकचा काळ उलटून देखील काम पूर्ण होऊ शकलेले नाही. नूतनीकरणाचे हे काम अगदी संथ गतीने सुरू असून चुकीच्या कामाचा फटका रुग्णांना बसत आहे. यातच लहान मुलांच्या वॉर्डात घाण पाणी शिरल्याने आरोग्य प्रशासनाचा कारभार समोर आला आहे. या निष्काळजीपणाला कोण जवाबदार? असा प्रश्न उपस्थित होत आहे. 

गटार तुंबल्याने पाणी वॉर्डात 
लहान मुलांचे अतिदक्षता विभाग वॉर्ड क्र.२५ आणि २६ चे नूतनीकरण सुरू असताना बांधकाम विभागाच्या कर्मचाऱ्यांनी बांधकामाचा कचरा दुसऱ्या मजल्यावरून खाली टाकायला सुरुवात केली. त्यामुळे गटार तुंबली आहे. परिणामी वॉर्ड २५ मधील बाथरूमचे घाणेरडे पाणी तुंबून संपूर्ण वॉर्डमध्ये पसरले. पाहता पाहता दुर्गंधी सुटली आणि वॉर्डमध्ये पाणी साचले गेले. या घटनेनंतर सफाई कर्मचाऱ्यांनी पाणी काढले, जवळपास दोन तासाच्या प्रयत्नानंतर परिस्थिती नियंत्रणात आली.