Nagpur News: बहीण-भावाची ताटातूट! तायडे तुला ओवाळणी देण्यासाठी माझ्याकडे पैसे नाहीत, म्हणत संपवलं जीवन

Nagpur:

दिवाळी सणाला प्रत्येक बहीण आपल्या माहेरी जाते. माहेरी गेल्यावर भाऊबिजेच्या दिवशी बहीण भावाला ओवाळते आणि भाऊ आपल्या ताईला पैशांच्या स्वरुपात ओवाळणी देतो. मात्र एका भावाने आपल्या बहिणीला दिवाळीची ओवाळणी देता न आल्याने नैराश्यातून आत्महत्या केली आहे. या घटनेमुळे परिसरात एकच खळबळ उडालीये. ('साम टीव्ही'चं व्हॉट्सअँप चॅनल जॉईन करण्यासाठी येथे क्लिक करा)

नागपूरच्या (Nagpur) इंदोरा परिसरात ही घटना घडलीये. राहुल सोमकुवर असं मृत युवकाचं नाव आहे. जरीपटका पोलिसांनी याबाबत दिलेल्या अधिक माहितीनुसार, राहुल एक बेरोजगार तरुण होता. गेल्या काही दिवसांपासून तो नोकरीच्या शोधात होता. मात्र त्याला कुठेच यश मिळत नव्हतं. हातात पैसे नसल्याने तो मोठ्या नैराश्यात होता.

या दिवळीनिमित्त लग्न झालेली बहीण (Sister) घरी आली होती. वर्षाने बहीण घरी आल्याने घरी आनंदाचं वातावरण होतं. मात्र पैसे नसल्याने घरात दिवाळीचं एकही फराळ बनवता आलं नाही. भाऊबिजेच्या दिवशी बहिणीने भावाला ओवाळलं होतं. त्यावेळी माझ्याकडे तुला ओवाळनी देण्यासाठी पैसे नाहीत, असं भाऊ म्हणाला. तसेच आसवांनी त्याचे डोळे बदबदले.

भावाची मानसीक अवस्था पाहून बहिणीने त्याची खूप समजूत काढली. मात्र बेरोजगारी आणि आर्थिक परिस्थितीमुळे तो जास्त खचला होता. अशात घरी आलेल्या बहिणीला साडीचोळी आणि ओवाळनी देण्यास पैसे नसल्याने भावाने रात्री सर्व झोपलेले असताना आत्महत्या केली.

त्याने आपल्या राहत्या घरी गळफास घेतला. घटनेची माहिती कुटुंबियांना समजताच त्यांच्या पायाखालची जमीनच सरकली. आपला भाऊ आपल्याला अशा पद्धतीने सोडून जाईल याची बहिणीला काहीच कल्पना नव्हती. या घटनेमुळे संपूर्ण गावात हळहळ व्यक्त होत आहे.