Nagpur : सकाळी काँग्रेसची साथ सोडली, रात्री भाजपातून उमेदवारीचा अर्ज भरला; नागपुरात राजकारण ३६० डिग्री फिरलं!

राज्यात एकीकडे महापालिकेच्या निवडणुकांची लगबग असताना दुसरीकडे पक्षापक्षांमध्ये फोडाफोडी सुरूच आहे. अशातच उत्तर नागपुरातील प्रभाग दोनमध्ये काँग्रेसला मोठा धक्का बसला आहे. तेथील माजी नगरसेविका नेहा निकोसे (Neha Nikose) यांनी काँग्रेसला सोडचिठ्ठी दिली. एवढेच नाही तर, दुपारी काँग्रेस सोडत रात्री भाजपची प्रभाग क्रमांक २ मधून उमेदवारी सुद्धा मिळवली. त्या प्रभागातून आणखीन काही काँग्रेस पदाधिकाऱ्यांनी पक्ष सदस्यत्वाचा राजीनामा दिला आहे.

उत्तर नागपूर हा काँग्रेसचे ज्येष्ठ नेते नितीन राऊत यांचा मतदारसंघ आहे. या मतदारसंघांमध्ये भाजपला तसा कठीण जाणारा भाग समजला जातो. नेहा निकोसे या २०१७ मध्ये प्रभाग २ मधून निवडून आल्या होत्या. मात्र यावेळी त्यांना काँग्रेसने डाववल्यामुळे त्यांनी भाजपमध्ये प्रवेश घेतला व लगेच त्यांना तिकीट मिळाले.

सोबतच उत्तर नागपूर अल्पसंख्यांक मोर्चा अध्यक्ष बाबू खान, महेंद्र बोरकर, राकेश निकोसे यांनीदेखील भाजपमध्ये प्रवेश घेतला आहे. माजी मंत्री नितीन राऊत हे निष्ठावान कार्यकर्त्यांना डावलत असून काँग्रेस या चुकीचे फळ भोगावे लागणार आहे. जनतेच्या हितासाठी काम करणाऱ्या लोकांना डावलण्याचं काम काँग्रेसचे नेते नितीन राऊत यांनी केलं आहे.

कॉंग्रेसच्या नेत्यांना रस्त्यावर उतरून धडा शिकवणार असेही काँग्रेस सोडून आलेले नेते बाबू खान यांनी माध्यमांशी बोलताना सांगितले. अनेक जण काँग्रेस सोडून भाजपमध्ये येणार असा दावाही बाबू खान यांनी केला.उमेदवारी अर्ज सादर करण्याला अवघे काही तास शिल्लक असताना, नागपूरमध्ये अद्यापही युती आणि आघाडीचा सस्पेंस कायम आहे.दरम्यान नागपूर महापालिकेवर कोणत्या पक्षाचा झेंडा फडकणार हे पाहणं महत्त्वाचं ठरणार आहे.