Crime News : त्रिकोणी प्रेम प्रकरणातून हिस्ट्रीशीटर गौरवची हत्या, मित्रानेच केला गेम; नागपुरातील खळबळजनक घटना

नागपुरात त्रिकोणी प्रेमप्रकरणातून एका मित्रानेच मित्राची हत्या केल्याची धक्कादायक घटना समोर आली आहे. नरेंद्रनगरातील सुंदरबन परिसरात गौरव रगडे याच्यावर चाकूने वार करण्यात आले. गंभीर जखमी अवस्थेत त्याला मेडिकल रुग्णालयात दाखल करण्यात आले; मात्र डॉक्टरांनी त्याला मृत घोषित केले. या प्रकरणी बेलतरोडी पोलिसांनी हत्येचा गुन्हा दाखल करून तपास सुरू केला आहे.

मिळालेल्या माहितीनुसार, मृत गौरव रगडे याच्यावर हत्या, हत्येचा प्रयत्न, दरोड्यासह तब्बल नऊ गंभीर गुन्हे दाखल होते. दोन आठवड्यांपूर्वीच तो कारागृहातून जामिनावर बाहेर आला होता. दरम्यान, रगडेचे एका तरुणीसोबत गेल्या दोन वर्षांपासून प्रेमसंबंध असल्याची माहिती पोलिसांना मिळाली आहे. याच तरुणीसोबत रगडेचा मित्र गौरव राऊत याचेही संबंध असल्याचे समोर आले. यामुळे दोघांमध्ये वाद निर्माण झाला होता. काही दिवसांपासून हा वाद वाढत असल्याचे सांगितले जात आहे.

घटनेच्या दिवशी संबंधित तरुणी गौरव राऊतच्या घरी पार्टीसाठी गेल्याची माहिती रगडेला मिळाली. यानंतर संतापलेल्या रगडेने राऊतच्या घरावर दगडफेक करत शिवीगाळ केल्याचा आरोप आहे. परिस्थिती चिघळल्यानंतर राऊत आणि त्याचे मित्र घराच्या मागील दरवाजातून बाहेर पडून जीव वाचवण्यासाठी पळाले. रगडेने त्यांचा पाठलाग केला. त्यानंतर सुंदरबन नाल्याजवळ रगडे आणि राऊत यांच्यात जोरदार झटापट झाली.

या झटापटीदरम्यान रगडेच्या हातातील चाकू हिसकावून त्याच्यावर वार करण्यात आल्याचा आरोप आहे. या हल्ल्यात रगडे गंभीर जखमी झाला. या प्रकरणात पोलिसांनी गौरव राऊत आणि अभिषेक वासनिक या दोघांना ताब्यात घेतले आहे. नेमक्या कोणत्या कारणातून आणि कशा पद्धतीने हत्या झाली, याचा तपास बेलतरोडी पोलीस करत आहेत. या घटनेमुळे नरेंद्रनगर परिसरात खळबळ उडाली आहे.