Accident: मुंबई-नाशिक महामार्गावर भीषण अपघात; कारच्या पुढील भागाचा चुरा, २ जणांचा जागीच मृत्यू

मुंबई-नाशिक महामार्गावर कारचा भीषण अपघात झालाय. या अपघातात दोन जणांचा जागीच मृत्यू झालाय. तर एक जण गंभीर जखमी झालाय. मुंबई-नाशिक महामार्गावरुन भरधाव जाणाऱ्या वॅगनार कार अनियंत्रित झाल्यानं हा अपघात झाला. कार वेगात असल्यानं चालकाचा गाडीवरील ताबा सुटल्याने हा अपघात झाला आहे. या घटनेमुळं परिसरात हळहळ व्यक्त केली जात आहे. दरम्यान, घटनेनंतर शहापूर पोलीस तात्काळ घटनास्थळी दाखल झाले होते.

दरम्यान, या संपूर्ण घटनेचा अधिकचा तपास शहापूर पोलीस करत आहेत. मिळालेल्या माहितीनुसार, या भीषण अपघातात मयुरेश विनोद चौधरी वय २९ रा. तानसा 2) जयेश किसन शेंडे वय २५ रा. उंबरखाड यांचा जागीच मृत्यू झालाय. हर्षल पांडूरंग जाधव वय २९ रा. पेंढरघोळ हा तरूण गंभीर जखमी झालाय. उपचारासाठी रूग्णालयात दाखल करण्यात आलाय.

अपघात इतका भयानक होता की, कार ने रस्त्याच्या कडेला असलेल्या सरक्षित भिंतीच्या कठड्याला जोरदार धडक दिली. सरक्षित भिंतीच्या कठड्याला जोरदार धडक देऊन कार ४० ते ५० फूट लांब जाऊन डिव्हायडरवर आदळली. यामुळे कारच्या पुढील दोन्ही एअरबॅक ओपन झाल्या. आणि कारमधील प्रवाशांना जबरदस्त मार लागला. यात दोघांचा मृत्यू झालाय. सध्या या संपूर्ण घटनेचा तपास शहापूर पोलीस करीत आहेत.

गेल्या चार दिवसापूर्वी मुंबई नाशिक महामार्गावरील माजिवडा भागात भीषण अपघात झाला होता. या अपघातात जीवितहानी झाली नव्हती, पण वाहतूक खोळंबली होती. माजिवडा येथील फ्लॉवर व्हॅली परिसरातून बुधवारी सकाळी ७ वाजताच्या सुमारास एक व्हॅन ठाण्याहून मुंबईच्या दिशेने जात होती. त्याचवेळी एका कंटेनरने त्या व्हॅनला धडक दिली. त्यामुळे व्हॅनविरुद्ध दिशेकडील वाहिनीवर जाऊन ठाणे महापालिकेच्या घंटागाडीला धडकली होती.