Mumbai Goa Highway Accident : मुंबई-गोवा महामार्गावर भीषण अपघात, ३ जणांचा जागीच मृत्यू, दोघे गंभीर

सचिन कदम, साम टीव्ही प्रतिनिधी

रायगड : मुंबई - गोवा महामार्गावर भीषण अपघात झाला. या अपघातात तिघांचा जागीच मृत्यू झाला. तर दोघे जण गंभीर जखमी झाले आहेत. या अपघातामुळं महामार्गावर वाहतूक कोंडी झाली होती. पाऊण तासानंतर वाहतूक पूर्ववत करण्यात आली.

मुंबई - गोवा महामार्गावर पोलादपूरजवळ हा अपघात झाला. कारने समोरील ट्रेलरला मागून धडक दिली. यात कारमधील तिघे जण जागीच ठार झाले. तर दोघे गंभीर जखमी झाले आहेत. मुंबईहून कोकणाकडे जाणाऱ्या मार्गिकेवर हा भयंकर अपघात झाला.

कारने ट्रेलरला मागून इतक्या मोठ्यानं धडक दिली होती की कारचा चक्काचूर झाला आहे. या भीषण अपघातामुळं महामार्गावरील वाहतूक काही वेळ ठप्प झाली होती. अपघाताची माहिती मिळाल्यानंतर पोलीस घटनास्थळी आले. स्थानिकांनीही पोलिसांना मदत केली. पाऊण तासात महामार्गावरील वाहतूक पुन्हा सुरू झाली.