Maharashtra Rain Update : आभाळ फाटलं! मुंबईसह राज्यात दमदार पावसाची एन्ट्री, कोणत्या जिल्ह्यांना झोडपलं? VIDEO

मुंबई : मुंबईसह राज्यात मुसळधार पावसाला सुरुवात झाली आहे. राज्यातील अनेक भागात विजेच्या कडकडाटासह पावसाने हजेरी लावली आहे. या मुसळधार पावसामुळे रस्त्यावर ठिकठिकाणी पाणी साचलं आहे. मुसळधार पावसामुळे काहींच्या घरात पाणी शिरलं आहे. या पावसामुळे नागरिकांची तारांबळ उडाली आहे. मुंबईसहित कल्याण, बदलापूरमध्ये पावसाचा जोर वाढला आहे.

कल्याणमध्ये मुसळधार

मुंबईसह राज्यातील विविध जिल्ह्याला पावसाने झोडपून काढलं आहे. कल्याणमध्ये सायंकाळी साडे सहाच्या सुमारास जोरदार पावसाने हजेरी लावली. अचानक आलेल्या पावसाने घरी परतणाऱ्या आणि खरेदीसाठी घर बाहेर निघालेल्या नागरिकांची चांगलीच तारांबळ उडाली. कल्याणमधील छत्रपती शिवाजी चौक परिसरातील रस्त्यावर गुडघाभर पाणी नागरिकांची तारांबळ उडाली. यामुळे रस्त्यावर मोठ्या प्रमाणात वाहतूक कोंडी केली. केडीएमसीच्या नालेसफाईची पुन्हा एकदा पोलखोल झाली आहे.

रत्नागिरीत पावसामुळे वाहतुकीत बदल

रत्नागिरीच्या खेड दापोली मुख्य मार्गावरील पर्यायी मार्गावर पाणी साचल्याने मुख्य मार्ग वाहतुकीसाठी बंद करण्यात आला आहे. खेड-दापोली मार्गावरील वाहतूक पर्यायी मार्गाने वळवली आहे. यामुळे खेडमधील दस्तुरी फाट्यावरून वळसा मारून करावा लागणार आहे. तर दापोलीमधील कुडावळ येथे रहदारीसाठी बांधलेली मोरी पाण्यात वाहून गेली आहे.

उल्हासनगर अंबरनाथमध्ये पावसाची रिमझिम

उल्हासनगर आणि अंबरनाथ शहरात सकाळपासून प्रचंड उकाडा होता. मात्र संध्याकाळच्या सुमारास पावसाने आता हजेरी लावली आहे. काही ठिकाणी जोरदार तर काही ठिकाणी रिमझिम पावसाच्या सरी बरसत आहेत. त्यामुळे वातावरणात गारावर निर्माण झाला आहे, दरम्यान कुठेही पाणी भरल्याची घटना समोर आलेली नाही.

गुहागरमध्ये दरडीचा भाग कोसळला

रत्नागिरीच्या गुहागर तालुक्यातील पालशेत या भागात आज मोठ्या प्रमाणात मुसळधार पाऊस पडला. या पावसामुळे सावरपाटी भागात पाणी भरलं आहे. पावसामुळे ७-८ घरात पाणी शिरले आहे. तर पालशेत येथील आगडीमंदिर येथील योगेश जाक्कर यांच्या घरात मागच्या बाजूस दरडीचा भाग कोसळ्याने माती घरात आली आहे. तर पाच माड भागात सुद्धा काही घरात पाणी शिरले आहे. प्रशासन सध्या झालेल्या नुकसानाचा पंचनामा करत असून नागरिकांना सतर्क राहण्याच्या सूचना देण्यात आल्या आहेत.