Har Har Mahadev Film : 'हर हर महादेव' चित्रपटाचा वाद पुन्हा चिघळला; संभाजी ब्रिगेड-मनसे आमनेसामने

नवनीत तापाडिया, अभिजीत सोनावणे

Har Har Mahadev Film : हर हर महादेव चित्रपटाचा शो सोमवारी ठाण्यात बंद पाडण्यात आला. राष्ट्रवादी कॉग्रेसच्या वतीने हा शो बंद करत प्रेक्षकांना शिवीगाळ केल्याचा प्रकार घडला. अशात आता मनसे आणि संभाजी ब्रिगेड या चित्रपटामुळे आक्रमक झाले आहेत. पुणे, औरंगाबाद, नाशिक या शहरांमध्ये दोन्ही गट आमनेसामने आले आणि मोठा राडा झाला. चित्रपटात दाखवलेल्या काही दृश्यांवरून हा वाद उफाळून आला आहे.

औरंगाबादेत संभाजी ब्रिगेड-मनसे भिडले

चित्रपटात शिवाजी महाराजांचा आम्ही कधीही न पाहिलेला इतिहास दाखवला जात आहे, असे आमदार जितेंद्र आव्हाडांचे मत आहे. तसेच संभाजी ब्रिगेडने देखील या चित्रपटाच्या अनेक सीनवर आक्षेप घेतला आहे. मात्र मनसेने(MNS) याला विरोध करत चित्रपटाचे शो सुरू ठेवण्यास सांगितले. त्यामुळेच आज औरंगाबादमधील (Aurangabad) सिडको आयनॉक्स तापडिया थिएटरसमोर संभाजी ब्रिगेड आणि मनसे आमनेसामने आले.

यावेळी शो बंद केल्यास थिएटरचे नुकसान होईल, असा इशारा मनसेने दिला होता, तर संभाजी ब्रिगेडने शो सुरू न करण्याची धमकी दिली होती. दोन्ही गट आमने-सामने आल्याने चित्रपटावरून मोठा वाद रंगला. अशात तात्काळ पोलिसांनी घटनास्थळी धाव घेतली आणि परिस्थिती नियंत्रणात आणली. संभाजी ब्रिगेडबरोबर शो बंद ठेवण्यासाठी मराठा क्रांती मोर्चाचे कार्यकर्ते देखील आयनॉक्स तापडिया थिएटरसमोर उपस्थित होते.

नाशिकमध्ये कारवाईचा इशारा

हर हर महादेव चित्रपटावरुन झालेल्या गोंधळाचे पडसाद नाशिकमध्येही पाहायला मिळाले. मनसे विधी शाखेने हर हर महादेव चित्रपटाचे शो सुरू ठेवण्याची मागणी केली आहे. चित्रपटात कोणतीही अक्षेपार्ह गोष्ट असेल तर सेन्सॉर बोर्ड त्यावर आक्षेप घेईल, असे मनसेच्या वतीने सांगण्यात आले. तसेच नाशिकमधून (Nashik) प्रेक्षकांनी देखील चित्रपट प्रदर्शनाची मागणी केली. यासह मनसेच्या कार्यकर्त्यांनी दोन दिवसांत चित्रपट प्रदर्शित नाही केला, तर सिनेमा ऍक्ट नुसार कारवाईचा इशारा दिला आहे.

पुण्यात बंद झालेला शो पुन्हा सुरू

हर हर महादेव चित्रपटाच्या प्रदर्शनासाठी मनसैनिकांनी चांगलीच कंबर कसली आहे. आज अनेक शहरांमध्ये मनसेच्या वतीने चित्रपट सुरू करण्यासाठी घोषणाबाजी करण्यात आली. तसेच पुण्यात बंद पाडलेले शो मनसैनिकांनी पुन्हा सुरू केले. कोथरूड सिटी प्राईड चित्रपट गृहात शो बंद पाडण्यात आला होता. मात्र मनसैनिकांनी घोषणाबाजी करत हा शो सुरू केला.