MBBSच्या विद्यार्थिनीने कॉलेजच्या छतावरून उडी मारून संपवलं जीवन, धक्कादायक कारण आलं समोर

चेतन व्यास, साम टीव्ही, प्रतिनिधी

वर्धा जिल्ह्यात एक एमबीबीएसच्या विद्यार्थिनीने कॉलेजच्या छतावरून उडी मारून आपलं जीवन संपवल्याची घटना घडली आहे. वर्धाच्या सावंगी मेघे येथील जवाहरलाल नेहरू वैद्यकीय महाविद्यालयात ही घटना घडली आहे. पूजा रजानी, असं मृत विद्यार्थिनीचे नाव आहे.

पूजा एमबीबीएसच्या द्वितीय वर्षात शिकत होती. वैद्यकीय कारणाने कॉलेजमध्ये गैरहजर राहत असल्याने तिला परीक्षा देण्यापासून रोखण्यात आल्याने ती तणावात होती, अशी माहिती येथील विद्यार्थ्यांनी दिली. मागील एक वर्षांपासून ती आजारी असल्याने कॉलेजमध्ये गैरहजर राहत होती.

मिळालेल्या माहितीनुसार, आज सकाळी तिने आपल्या सहकारी मैत्रिणीला परीक्षेवरील बंदी हटावी म्हणून ती वरिष्ठाची भेट घेणार असल्याच सांगितलं, अशी माहिती तिच्या मैत्रणीने दिली. त्याच्या काही वेळेनंतर तिने कॉलेजच्या छतावरून उडी मारत जीवन संपवलं.

या घटनेनंतर विद्यार्थ्यांमध्ये संतापाचे वातावरण आहे. घटनास्थळी पोलिसांचा मोठा फौजफाटा दाखल करण्यात आला आहे. पोलीस अधीक्षक नुरूल हसन, अप्पर पोलीस अधीक्षक व सावंगी पोलीस या यापाराकरणी अधिक तपास करत आहेत.

वैद्यकीय महाविद्यालय प्रशासनाने काय सांगितलं?

या घटनेवर वैद्यकीय महाविद्यालय प्रशासनाने आपली भूमिका स्पष्ट केली आहे. मागील काही दिवसांपासून तरुणी तणावात होती, त्यातून तिने आत्महत्या केली, असावी असा अंदाज त्यांनी व्यक्त केला आहे. विद्यार्थीना परीक्षेत न बसाविण्याबाबत महाविद्यालयाचा कोणताही वेगळा निर्णय नाही आहे. युजीसीने कोणत्याही वैद्यकीय महाविद्यालयातील विद्यार्थी हा 75 टक्के थेरीत आणि 80 टक्के प्रॅक्टिकलमध्ये उपस्थित असणे आवश्यक आहे, हे युजीसीच्या नियमात आहे. आजच्या घटणेबाबत वैद्यकीय महाविद्यालय प्रशासन तातडीने माजी कुलगुरु राजीव बोरले यांच्या नेतृत्वात उच्च स्तरीय समिती स्थापन केली आहे ही समिती या प्रकरणाचा तपास करणार आहे. रुग्णालयाचे विशेष कार्यकारी अधिकारी अभ्यूदय मेघे यांनी ही माहिती दिली आहे.