Valentine Day : व्हॅलेंटाईनला मावळच्या गुलाबाचा बहर; ८० लाख फुलांची परदेशात निर्यात; गुलाब निर्यातीत मावळ राज्यात प्रथम

मावळ : 'व्हॅलेंटाईन डे' म्हणजे प्रेम व्यक्त करण्याचा दिवस. या दिवशी गुलाबाच्या फुलाची मागणी अधिक होत असते. याच अनुषंगाने मावळ तालुक्यातून परदेशात गेल्या एक महिन्यात ८० लाख गुलाब फुलांची निर्यात झाली असून एका फुलाला चौदा ते सोळा रुपये भाव मिळाला. त्यामुळे राज्यात सर्वात जास्त परदेशी गुलाब फुले निर्यात करणारा मावळ पहिला क्रमांकावर राहिला आहे. 

व्हॅलेंटाईन डे म्हटला म्हणजे तरुणाईमध्ये उत्साह संचारलेला असतो. प्रेम व्यक्त करण्याचा हा दिवस दोन दिवसांवर आलेला आहे. जगभरात साजरा केला जाणारा व्हॅलेंटाईन निमित्ताने गुलाबाचे फुल, गिफ्ट दिले जात असते. यामुळे या काळात मोठ्या प्रमाणात गुलाबाच्या फुलांची मागणी वाढत असते. यामुळे मावळमधून मोठ्या प्रमाणात गुलाबाची निर्यात करण्यात येत असते. मागील महिनाभरापासून निर्यात केली जात आहे. 

जपान, युरोपात निर्यात 

मावळातील गुलाब फुले हॉलंड, ब्रिटन, दुबई, सिंगापूर, जपान, सह युरोपातील देशात निर्यात केली जातात. मावळचा गुलाब हा प्रदेशात मोठ्या प्रमाणात विक्री होते. त्यामुळे जगभरातील प्रेमी मावळ मधील गुलाबाच्या प्रेमात पडल्याचे दिसून येते. यावर्षी परदेशात ४२ सेंटीमीटरच्या गुलाबाला अकरा रुपये, ५२ सेंटीमीटरच्या गुलाबला पंधरा रुपये, तर ६२ सेंटीमीटरच्या गुलाबाला १६ रुपये असा भाव मिळाला आहे. यावर्षी मावळात करोडो रुपयांची उलाढाल झाल्याचे चित्र दिसत आहे. त्यामुळे मावळातील शेतकरी आनंदीत आहे. 

वातावरणामुळे झाला परिणाम 

गेल्या दीड महिन्यापासून तापमानातील चढ-उतार व ढगाळ हवामानामुळे गुलाब फुल शेतीवर विपरीत परिणाम झाल्याचे पाहण्यास मिळाले होते. त्यामुळे फूलशेतीवर याचा विपरीत परिणाम झाला होता. गुलाब फुले निर्यातीचा कालावधी सुरू होण्यापूर्वीच दहा दिवस फुले उमलण्यास सुरुवात झाल्याने काही उत्पादकांना ती स्थानिक बाजारपेठेत कमी भावात विकावी लागली होती. हवामानातील चढ उतारामुळे आठ ते दहा दिवस लवकर सुरुवात झाल्याने मागणीप्रमाणे पुरवठा करण्यात गुलाब फुले उत्पादकांची तारांबळ उडाली होती.