Maval : पाच किलोमीटरची पायपीट थांबली; नवरात्र उत्सवात सावित्रीच्या लेकींचा सायकल देऊन सन्मान

मावळ : गावापासून शाळा थोड्या दूर अंतरावर असल्याने शाळेत जाण्यासाठी विद्यार्थिनींना दररोज पायपीट करत जावे लागत होते. मात्र विद्यार्थिनींची दररोज होणारी पाच किलोमीटरची पायपीट थांबणार आहे. कारण मावळच्या दिवड येथील श्री संत ज्ञानेश्वर माध्यमिक विद्यालयातील एकवीस सावित्रीच्या लेकींना नवरात्र उत्सवात सायकलींचे वाटप करून गौरविण्यात आले आहे.  

नवरात्र उत्सवात घरोघरी कुमारिका पूजन मोठ्या प्रमाणात केले जाते. हाच धागा धरून युनियन बँक ऑफ इंडिया यांच्यावतीने मुलींना सायकलीचे वाटप करण्यात आले. मावळ तालुक्याचे शेवटच टोक म्हणून ओळखल्या जाणाऱ्या अतिशय ग्रामीण भागातील गाव म्हणजे दिवड. या गावात संत ज्ञानेश्वर माध्यमिक विद्यालय असून पहिली ते दहावी पर्यंत शिक्षण दिले जाते. या शाळेत सातशे विद्यार्थी शिक्षण घेत आहे. 

शाळेत जाण्यासाठी विद्यार्थिनींना पायपीट करत जावे लागत होते. अर्थात रोज पाच किलोमीटरची हि पायपीट असायची. अतिशय ग्रामीण भाग असल्यामुळे युनियन बँकेच्या ही बाब लक्षात आली त्यांनी आठवी आणि दहावी मध्ये शिकणाऱ्या २१ विद्यार्थ्यांना सायकलीचे वाटप करण्याचं निर्णय घेतला. नवरात्रोत्सवाचा मुहूर्त साधत सायकलींचे वाटप करण्यात आले आहे. दरम्यान सायकल मिळाल्यानंतर विद्यार्थिनींच्या चेहऱ्यावर वेगळाच आनंद बघायला मिळाला.

मुलींच्या चेहऱ्यावर आनंद 

रोज पाच ते सहा किलोमीटर पायपीट करत शाळेत आम्ही जात होतो. मात्र सायकल मिळाल्यामुळे येण्या- जाण्याचा प्रश्न सुटला असून वेळ वाचणार आहे. आम्ही तो वेळ अभ्यास करण्या करिता आम्हाला मिळणार आहे. त्यामुळे आम्हाला फार आनंद झालेला आहे. या कार्यक्रमाला युनियन बँकेचे व्यवस्थापक, ग्रामस्थ, शिक्षक, यासह मोठ्या प्रमाणात विद्यार्थी सहभागी झाले होते.