Maratha Reservation: '54 लाख नोंदी सापडल्या त्यापैकी 99 टक्के जुन्या', ओबीसी नेते बबनराव तायवाडे यांचा दावा

>> पराग ढोबळे

Babanrao Taywade On Maratha Reservation:

जरांगे म्हणतात 37 लाख लोकांना प्रमाणपत्र निर्गमित केले आहेत. आणि त्यांच्याकडे यादी आहे. तर त्या यादीच्या प्रतीक्षेत आम्ही आहोत. माझ्या मते, ज्या काही 54 लाख नोंदी सापडल्या त्यापैकी 99 टक्के जुन्याच नोंदी आहेत, असं ओबीसी महासंघाचे नेते डॉ. बबनराव तायवाडे म्हणाले आहेत. मराठा आरक्षणाच्या मागणीसाठी लाखो मराठा बांधवांसह मनोज जरांगे पाटील हे मुंबईच्या वेशीवर पोहोचले आहेत.

यातच आज जरांगे यांनी 54 लाख मराठा बांधवांच्या नोंदी मिळाल्यात, असं म्हणाले आहेत. याचबद्दल साम टीव्हीशी बोलताना बबनराव तायवाडे असं म्हणाले आहेत. ('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

ते म्हणाले, जर 37 लाख लोकांना प्रमापत्र मिळाले असतील तर, आरक्षण मिळालेलं आहे. तर मग नोकर भरती स्थगित ठेऊन जागा रिक्त ठेवण्याच्या मागणीचे कारण काय? मग जागा कोणासाठी रिक्त ठेवायचे हे जरांगे यांनी स्पष्ट करायला पाहिजे, असं ते म्हणाले आहेत. (Latest Marathi News)

तायवाडे म्हणाले, सगेसोयरे संदर्भात निर्णय घेणे हे राज्य सरकारच्या हातात नाही. आपली पितृसत्ताक असल्याने वडिलांची जात मुलांना लागते, आईकडची जात लागत नाही.

ते पुढे म्हणाले, जे जीआर जरांगे मागत आहे, ते सर्व जुनेच नियम आहेत. 12वी पर्यंत मुलींना मोफत शिक्षण आहेच. त्या पुढच्या शिक्षणासाठी ही मदत मिळते. जरांगे यांच्या ज्या काही मागण्या होत्या त्या मान्य झाल्याचे चित्र आहे. त्यामुळे रात्रीभरात आंदोलन समाप्त होईल, अशी अपेक्षा आहे.