राज्यात पवार नावाचं वलय कायम ठेवायचं असेल तर..., सुनेत्रा पवारांनी उपमुख्यमंत्रीपदाची शपथ घेताच मनोज जरांगेंचं मोठं विधान

अक्षय शिंदे, साम टीव्ही

जालना: अजित पवार यांचं निधन झाल्यानंतर राष्ट्रवादी काँग्रेसचा वारसा कोण पुढे घेऊन जाणार? तसेच पुढचा उपमुख्यमंत्री कोण होणार? असे अनेक प्रश्न राज्याच्या राजकारणात एकमेकांना विचारले जात होते. अखेर आज या सर्वांचे उत्तर राज्याला मिळाली. दिवंगत अजित पवार यांच्या पत्नी सुनेत्रा पवार यांनी आज उपमुख्यमंत्रीपदाची शपथ घेतली आणि राज्याच्या पहिल्या महिला उपमुख्यमंत्री म्हणून इतिहासात नोंद केली.

राज्यपाल आचार्य देवव्रत यांनी त्यांना मंत्री म्हणून आणि गोपनीयतेची शपथ दिली. हा कार्यक्रम अगदी कमी लोकांमध्ये लोकभवन येथे पार पडला. दरम्यान यावर आता मराठा आंदोलक मनोज जरांगे पाटील यांनी प्रतिक्रिया दिली आहे.

मनोज जरांगे नेमक काय म्हणाले?

राज्यात पवार नावाचं वलय कायम ठेवायचं असेल तर पवार कुटुंबानं गुप्त पद्धतीने का होईना एकमेकांना साथ द्यावी आणि एकसंघ राहावं अशी प्रतिक्रिया मनोज जरांगे पाटील यांनी दिली आहे. ते जालन्यात बोलत होते. सुनेत्रा पवारांसह त्यांच्या दोन्हीही मुलांवर आता मोठी जबाबदारी आली आहे. मात्र अजित पवारांचा वारसा सुनेत्रा पवार सक्षमपणे चालवतील असा विश्वास मनोज जरांगे पाटील यांनी सुनेत्रा पवार यांच्या शपथविधी सोहळ्यानंतर व्यक्त केला आहे.

मरगळ झटकून आता ठाकरे, पवार कुटुंबानं सक्षमपणे उभं राहावं अशी अपेक्षा देखील जरांगे यांनी व्यक्त केली. सुनेत्रा पवार यांना उपमुख्यमंत्री केल्यानं दादांची जागा दादांच्या परिवाराला मिळाली हे चांगलं झालं असंही त्यांनी नमूद केलं. शरद पवार यांच्यासह पवार कुटुंब आणि देवेंद्र फडणवीस हे सुनेत्रा पवार यांच्या पाठीमागे ढाल म्हणून उभे राहतील अशी आशाही जरांगे यांनी व्यक्त केली. दोन राष्ट्रवादी एकत्र येऊ नये म्हणून अजित पवार गटाच्या नेत्यांनी बैठक घेतली की नाही याबाबत मला काहीही माहिती नसल्याचं जरांगे म्हणाले.

माझ्या घातपात प्रकरणात धनंजय मुंडेंच्या SIT चौकशीची मागणी राज्याच्या गृह मंत्रालयाकडे करणार असल्याचं जरांगे यांनी स्पष्ट केलं आहे. जिल्हा परिषद निवडणुकीनंतर ही मागणी केली जाणार असल्याच जरांगे म्हणाले.