ऐन ZP निवडणुकीत उद्धव ठाकरेंना मोठा हादरा; माजी मंत्र्याच्या मुलाची भाजपमध्ये एन्ट्री

सचिन कदम, साम टीव्ही

महापालिका निवडणुकीच्या निकालानंतर भाजपने जिल्हा परिषदांच्या निवडवणुकीला जोरदार तयारी सुरू केली आहे. काही जिल्ह्यात भाजप आणि शिंदे गटाच्या युतीची घोषणा होऊ लागली आहे. तर काही ठिकाणी भाजप आणि शिंदे गट स्वबळावर लढण्याचे चिन्ह दिसत आहे. विरोधक महापालिका निवडणुकीच्या विश्लेषणात व्यग्र असताना भाजपने ठाकरे गटाचा बडा नेता फोडला आहे.

कोकणातही भाजप आणि शिंदे गटाने जिल्हा परिषदेच्या निवडणुकीसाठी फिल्डिंग लावण्यास सुरुवात केली आहे. या निवडणुकीदरम्यनान भाजपने उद्धव ठाकरेंना मोठा हादरा दिलाय. माजी गृहराज्यमंत्री तथा महाडचे माजी आमदार प्रभाकर मोरे यांचे पुत्र अमित मोरे यांनी भाजपमध्ये प्रवेश केला आहे. अमित मोरे यांच्या रुपाने भाजपने रायगडच्या महाडमध्ये शिवसेना ठाकरे गटाला मोठा धक्का बसला आहे.

भाजपचे रायगड जिल्हाध्यक्ष खासदार धैर्यशिल पाटील यांच्या उपस्थिती पक्ष प्रवेशाचा सोहळा पार पडला. अमित मोरे हे महाडच्या विन्हेरे जिल्हा परिषद मतदार संघाचे माजी सदस्य आहेत. भाजप, राष्ट्रवादी युतीकडून अमित मोरे महाडच्या विन्हेरे जिल्हा परिषद मतदार संघातुन निवडणूक लढवणार असल्याची प्राथमिक माहिती हाती आली आहे.

पुण्यात राष्ट्रवादी काँग्रेसला खिंडार

पुणे जिल्हा परिषद निवडणुकीसाठी भाजपकडून जोरदार तयारी सुरू झाली आहे. जिल्हा परिषद निवडणुकीच्या तोंडावर पुण्यात राष्ट्रवादी काँग्रेसला जिल्ह्यात खिंडार पडलं आहे. राष्ट्रवादीच्या जिल्हा उपाध्यक्षांनी भाजपमध्ये प्रवेश केला आहे. माजी आमदार पोपटराव गावडे यांचे सुपुत्र आणि राष्ट्रवादीचे जिल्हा उपाध्यक्ष राजेंद्र गावडे यांचा भाजपमध्ये प्रवेश केला आहे.

पुणे जिल्हा राष्ट्रवादी काँग्रेसचे उपाध्यक्ष राजेंद्र गावडे, जिल्हा परिषदेच्या बालकल्याण समितीच्या सभापती सुनीता गावडे, शिरुरच्या माजी नगराध्यक्षा मनीषा गावडे यांनी भाजपमध्ये प्रवेश केला आहे. चंद्रकांत पाटील यांच्या उपस्थितीत गावडे यांनी भाजपमध्ये प्रवेश केला आहे.