Maharastra Politics : साखरपट्टा महायुतीला कडू? शरद पवारांच्या डावाने सत्ताधाऱ्यांचं टेन्शन वाढलं? वाचा सविस्तर

भरत मोहोळकर, साम टीव्ही

मुंबई : महाराष्ट्राचं सत्ताकेंद्र असलेल्या पश्चिम महाराष्ट्रातील साखर पट्ट्यात राजकीय हालचालींना वेग आलाय. लोकसभेला 12 पैकी 7 महाविकास आघाडीचे खासदार निवडून आल्याने महाविकास आघाडीचा आत्मविश्वास वाढलाय. तर महायुती अस्वस्थ झाल्याची चर्चा आहे. त्यापार्श्वभूमीवर 2014 नंतर भाजपवासी झालेल्या सहकार सम्राटांनी पुन्हा घरवापसीचे वेध लागले आहेत. त्यामुळे साखरपट्टा महायुतीसाठी कडू ठरण्याची शक्यता आहे. मात्र 2019 मध्ये साखरपट्ट्याचं राजकीय समीकरण काय पाहूयात.

पश्चिम महाराष्ट्रात 288 पैकी 70 जागा आहेत. 2019 मध्ये राष्ट्रवादीच्या 27, भाजप 20, काँग्रेस 12, शिवसेना 8 तर इतरांचा 6 जागांवर विजय झाला होता. अहमदनगर जिल्ह्यात कांदा आणि दूध दराचा मुद्दा डोकेदुखी वाढवणार असल्याचं बोललं जात आहे. तर कोल्हापूरमध्ये काँग्रेसची वाढलेली ताकद आणि नेत्यांचा तुतारीकडील ओढा महत्वाचा आहे. लोकसभेत मोहिते पाटील आणि प्रणिती शिंदेंच्या विजयामुळे सोलापूरमध्ये महायुतीचं आव्हान वाढलं आहे.

सांगलीत अपक्ष खासदार विशाल पाटील काँग्रेसमध्ये गेल्यानं महायुतीचं टेंशन वाढलं आहे. शरद पवारांचा बालेकिल्ला असलेल्या साताऱ्यातील 8 मतदारसंघात जोरदार फिल्डिंग लावण्यात आली आहे. तर हर्षवर्धन पाटलांसारख्या नेत्यांना गळाला लावण्याचा प्रयत्नामुळे महायुतीची कोंडी झाली आहे.

लोकसभेला साखरपट्ट्याने महाविकास आघाडीला साथ दिली. मात्र आता विधानसभेला दिग्गजांचा ओढा महाविकास आघाडीकडे असल्याने साखरपट्टा महायुतीसाठी कडू ठरणार का? याकडे लक्ष लागलंय.