Dogs Attack : दरवाजा उघडा असल्याचे पाहून घरात घुसले, झोपलेल्या महिलेचे लचके तोडले; सांगलीत मोकाट कुत्र्यांचा कहर

सांगली शहराच्या संजयनगर भागात सोमवारी दुपारी घडलेल्या एका धक्कादायक घटनेने स्थानिक रहिवाशांमध्ये भीती आणि संतापाचं वातावरण पसरलं आहे. स्फूर्ती सोसायटीमध्ये राहणाऱ्या सविता कोळेकर या ४५ वर्षीय महिलेला चार ते पाच मोकाट कुत्र्यांनी थेट घरात घुसून चावा घेतल्याने त्या गंभीर जखमी झाल्या. त्यांच्यावर रुग्णालयात तातडीने उपचार सुरु करण्यात आले आहेत.

सविता कोळेकर दुपारच्या सुमारास वामकुक्षी घेत असताना ही घटना घडली. घराचा दरवाजा उघडा असल्याने कुत्रे आत घुसले आणि त्यांनी त्यांच्या हातावर, पायावर व शरीराच्या इतर भागांवर जबरदस्त चावा घेतला. त्यानंतर त्या रक्ताच्या थारोळ्यात पडलेल्या अवस्थेत आढळून आल्या. कुटुंबीयांनी तात्काळ त्यांना वसंतदादा पाटील शासकीय रुग्णालयात दाखल केलं असून त्यांच्यावर सध्या उपचार सुरू आहेत.

या घटनेनंतर परिसरात नागरिकांचा संताप उफाळून आला आहे. संजयनगर परिसरात मोकाट कुत्र्यांचा त्रास काही नवीन नाही. याआधीही अनेक लहान मुलांवर आणि महिलांवर अशाच प्रकारे हल्ले झाले आहेत. मात्र, महापालिकेकडे वारंवार तक्रारी करूनही ठोस कारवाई झालेली नाही, असा आरोप स्थानिकांनी केला आहे.

सामाजिक कार्यकर्ते संजय कांबळे यांनी संतप्त प्रतिक्रिया देताना सांगितले की, “महापालिकेने जर तातडीने मोकाट कुत्र्यांचा बंदोबस्त केला नाही, तर आम्ही हे कुत्रे थेट महापालिका आयुक्तांच्या दालनात सोडू.” त्यांच्या या इशाऱ्यामुळे प्रशासनावर दबाव वाढला असून, लवकरच कारवाई होण्याची अपेक्षा व्यक्त केली जात आहे.

दरम्यान, या प्रकारामुळे संजयनगर परिसरातील नागरिकांमध्ये भीतीचे वातावरण निर्माण झाले असून, पालिकेच्या दुर्लक्षामुळे मोकाट कुत्र्यांचा प्रश्‍न अधिकच गंभीर होत चालला आहे. सध्या सविता कोळेकर यांची प्रकृती चिंताजनक नसली तरी त्यांना वैद्यकीय निरीक्षणाखाली ठेवण्यात आले आहे. स्थानिकांनी महापालिकेकडे तातडीच्या उपाययोजनांची मागणी केली आहे.