Rashmi Shukla: रश्मी शुक्लांच्या बदलीचे विरोधकांकडून स्वागत, आशिष शेलारांकडून नाना पटोले यांना इशारा

राज्याच्या पोलिस महासंचालक रश्मी शुक्ला यांना निवडणूक आयोगाने पदावरून हटवले. राज्यातील विधानसभा निवडणुकीच्या रणधुमाळीमध्ये निवडणूक आयोगाने हा मोठा निर्णय घेतला. निवडणूक आयोगाने त्यांची तात्काळ बदली करण्याचे आदेश दिले. निवडणूक आयोगाच्या या निर्णयाचे विरोधकांनी स्वागत केले आहे. 'महायुतीचे सरकार बेईमानी करत होते हे आज स्पष्ट झाले.', असल्याचे मत काँग्रेस नेते विजय वडेट्टीवर यांनी व्यक्त केले. तर, 'रश्मी शुक्ला यांची बदली थोडी विलंबाने का होईना पण झाली.', असे मत शिवसेना ठाकरे गटाचे नेते अंबादास दानवे यांनी व्यक्त केले.

विजय वडेट्टीवार यांनी आपल्या अधिकृत एक्स अकाऊंटवर पोस्ट करत लिहिले की, 'राज्याच्या पोलिस महासंचालक रश्मी शुक्ला यांची बदली करण्याचा निर्णय आज निवडणूक आयोगाने घेतला आहे. आम्ही या निर्णयाचे स्वागत करतो. महायुतीचे सरकार बेईमानी करत होते हे आज स्पष्ट झाले. गंभीर स्वरूपाचे आरोप असलेल्या पोलिस अधिकारी रश्मी शुक्ला यांना मुदतवाढ देण्याची अशी कोणती मजबुरी महायुती सरकारची होती? महाराष्ट्रातील विधानसभा निवडणूक पारदर्शक पद्धतीने होऊ नये म्हणून सरकारने त्यांना मुदतवाढ दिली होती. असंवैधानिक मार्गाने आलेल्या सरकारने असंवैधानिक मार्गाने अधिकाऱ्यांना पदांवर बसवले होते हे आज स्पष्ट झाले आहे. मर्जीतील अधिकाऱ्यांना मुदतवाढ देऊन सत्तेचा दुरुपयोग महायुती सरकारने केला होता!'

शिवसेना ठाकरे गटाचे नेते अंबादास दानवे यांनी सांगितले की,'राजकीय हेतूने काम करणाऱ्या पोलिस महासंचालक रश्मी शुक्ला यांची बदली थोडी विलंबाने का होईना पण झाली. मात्र आमची @ECISVEEP यांना ही मागणी असेल की, १. रश्मी शुक्ला यांना निवडणुकीशी निगडित कोणत्याही कामात ठेवू नये. २. निवडणुकीच्या तोंडावर त्यांनी केलेल्या बदल्यांचा पुनर्विचार होऊन त्या रद्द करण्यात याव्यात!'

भाजपचे नेते आशिष शेलार यांनी रश्मी शुक्ला यांच्या बदलीवर प्रतिक्रिया देताना सांगितले की, 'अधिकाऱ्याला समाजात टार्गेट करण्याची भूमिका उद्या काँग्रेसला भारी पडू शकते. निवडणूक आयोग निष्पक्ष आहे आता तरी मान्य करणार का? बेछूट आरोप करण्याआधी नाना पटोलेंनी पुरावे द्यावे. पुरावे द्या अन्यथा पटोले यांची निवडणूक आयोगाकडे तक्रार करणार. फडणवीसांचे नाव घेत असाल तर आरोप द्या. अन्यथा बदनामी करण्याच्या अंतर्गत कारवाई करण्याची मागणी मी निवडणूक आयोगाकडे करेल.' असा इशारा आशिष शेलार यांनी नाना पटोले यांना दिला.