Ambernath-Kalyan Political News : ठाकरे गटाचे कल्याण लोकसभा संपर्कप्रमुख सुभाष भोईर यांनी कल्याण लोकसभेची जागा लढवण्यासाठी मोर्चेबांधणी सुरू केल्याचे चित्र पाहायला मिळत आहे.
एकीकडे महाविकास आघाडीत ठाणे आणि कल्याणची जागा ठाकरे गटाला सोडण्याच्या हालचाली सुरू असतानाच, दुसरीकडे कल्याण लोकसभा मतदारसंघातील अंबरनाथ (Ambernath) शहरात सुभाष भोईर यांच्या वाढदिवसानिमित्त लावलेल्या बॅनर्सवर भोईर यांचा 'भावी खासदार' असा उल्लेख करण्यात आला आहे. त्यामुळे या बॅनर्सची जोरदार चर्चा होत आहे. (Latest Marathi News)
सुभाष भोईर हे २०१४ साली कल्याण ग्रामीण विधानसभेतून शिवसेनेच्या तिकीटावर आमदार झाले होते. मात्र २०१९ साली विधानसभा निवडणुकीत त्यांना तिकीट देण्यात आलं नाही. कल्याण-डोंबिवलीचे नगरसेवक रमेश सुकऱ्या म्हात्रे यांना संधी देण्यात आली होती. त्या निवडणुकीत रमेश म्हात्रे यांचा पराभव होऊन मनसेचे राजू पाटील हे आमदार म्हणून निवडून आले होते.
मागील विधानसभा निवडणुकीत तिकीट दिलं नसल्यानं सुभाष भोईर हे एकनाथ शिंदे आणि खासदार श्रीकांत शिंदे यांच्यावर नाराज असल्याची चर्चा होती. त्यामुळेच एकनाथ शिंदे यांनी 'उठाव' केल्यानंतर सुभाष भोईर यांनी मात्र ठाकरे गटातच राहणे पसंत केले होते. इतकेच नव्हे, तर कल्याण लोकसभा मतदारसंघाचं संपर्कप्रमुखपद देखील त्यांना देण्यात आले होते. यानंतर आता सुभाष भोईर यांनी थेट श्रीकांत शिंदे यांनाच शह देण्याचा प्रयत्न सुरू केल्याची चर्चा आहे.
सुभाष भोईर यांच्या वाढदिवसानिमित्त अंबरनाथ शहरात लावलेल्या बॅनर्सवर त्यांचा 'भावी खासदार' असा उल्लेख करण्यात आला आहे. महाविकास आघाडीच्या जागावाटपात ठाणे आणि कल्याण या लोकसभेच्या दोन जागा ठाकरे गटाला सोडण्याची शक्यता आहे. त्यामुळे तसं झालं, तर आपल्यालाच लोकसभेचे तिकीट मिळावं आणि आपल्यावर झालेल्या अन्यायाचा वचपा काढता यावा, असा सुभाष भोईर यांचा प्रयत्न असू शकतो, अशी चर्चा राजकीय वर्तुळात सुरू आहे.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.