Maharashtra Politics : एकनाथ शिंदेंचा उद्धव ठाकरेंना नाशिकमध्ये धक्का! ठाकरेंचे अनेक माजी नगरसेवक हाती घेणार 'धनुष्यबाण'

नाशिकमध्ये उद्धव ठाकरेंच्या शिवसेनेला धक्का बसला आहे. ठाकरे गटाच्या सहा माजी नगरसेवकांनी एकनाथ शिंदेंच्या शिवसेनेमध्ये प्रवेश करण्याचा निर्णय घेतला आहे. या नगरसेवकांचा उद्या (२९ जून रोजी) दुपारी बाराच्या सुमारास ठाण्यामध्ये पक्ष प्रवेश होणार आहेत. यामुळे नाशिकमध्ये शिंदे गटाचे वर्चस्व वाढणार आहे.

उद्धव ठाकरे गटाला एकनाथ शिंदे यांच्याकडून नाशिकमध्ये धक्का देण्यात आला आहे. माजी नगरसेवक, शेकडो कार्यकर्ते आणि समर्थक शिंदे गटामध्ये प्रवेश करणार आहेत. काही दिवसांपूर्वी ठाकरे गटाचे मोठे नेते सुधाकर बडगुजर यांनी शिंदेंच्या गटामध्ये प्रवेश केला होता. आता माजी नगरसेवकांनी साथ सोडल्याने ठाकरे गटाची नाशिकमधील ताकद कमी होणार असल्याचे म्हटले जात आहे.

नागपूरमध्ये ठाकरे गटाला धक्का

स्थानिक स्वराज्य संस्थांच्या निवडणुकींच्याआधी ठाकरे गटातून नेते, पदाधिकारी बाहेर पडत असल्याचे पाहायला मिळत आहे. एका बाजूला ठाकरे गटाकडून मोर्चेबांधणी सुरु असताना दुसऱ्या बाजूला ठाकरे गटाला गळती सुरु असल्याचे म्हटले जात आहे. नाशिकसोबतच उद्धव ठाकरेंच्या शिवसेनेला नागपूरमध्येही धक्का बसला आहे.

ठाकरे गटाचे माजी नागपुर शहर प्रमुख राजू तुमसरे हे एकनाथ शिंदे यांच्या शिवसेना पक्षात प्रवेश करणार आहेत. उपमुख्यमंत्री शिंदे यांच्या उपस्थितीमध्ये त्यांचा पक्षप्रवेश होणार आहे. तुमसरे यांच्यासह नागपुरातील ठाकरे आणि काँग्रेस पक्षाचे स्थानिक नेते देखील शिंदेंच्या सेनेत प्रवेश करणार असल्याचे म्हटले जात आहे.