Maharashtra Politics: शरद पवार गटाला मोठा धक्का; एकाचवेळी दोन नेत्यांचा तडकाफडकी राजीनामा

स्थानिक स्वराज्य संस्थेच्या निवडणुकांचा बिगुल वाजलाय. राज्य निवडणूक आयोगानं मंगळवारी पत्रकार परिषद घेऊन नगरपरिषद आणि नगरपंचायतीच्या निवडणुकांची घोषणा केली. त्यापार्श्वभूमीवर राजकीय पक्ष कामाला लागली आहेत. प्रत्येक पक्ष आपली ताकद वाढवण्यासाठी स्थानिक पातळीवर मोर्चेबांधणी करत आहे. मात्र त्याचवेळी धाराशिवमध्ये शरद पवार गटाला मोठा धक्का बसलाय. एकाचवेळी दोन मोठ्या नेत्यांनी पक्षाचा राजीनामा दिलाय.

धाराशिवमधील शरद पवार गट राष्ट्रवादीचे, जिल्हाध्यक्ष संजय पाटील दुधगावकर यांनी तडकाफडकी राजीनामा दिलाय. त्यांनी आपला राजीनामा राष्ट्रवादी शरद पवार पक्षाचे प्रदेशाध्यक्ष शशिकांत शिंदे यांच्याकडे पाठवलाय. स्थानिक स्वराज्य संस्थेच्या निवडणुकांच्या तोंडावरच संजय पाटील आणि संजय निंबाळकर यांनी राजीनामा दिल्याने राजकीय वर्तुळात खळबळ उडालीय. दुधगावकर यांच्यासह राष्ट्रवादी शरद पवार पक्षाचे नेते संजय निंबाळकर यांनी सदस्यत्वाचा राजीनामा दिल्यानं शरद पवार यांना हा मोठा धक्का असल्याचं मानलं जात आहे.

निंबाळकर यांनी २०१९ मध्ये राष्ट्रवादीकडून विधानसभा निवडणूक लढवली होती. या दोन्ही नेत्यांनी राजीनामा का दिला यांचे कारण अस्पष्ट आहे. दरम्यान दुधगावकर कोणता राजकीय निर्णय घेणार याकडे सर्व कार्यकर्त्यांचे लक्ष लागले आहे. संजय निंबाळकर यांनी आपला राजीनामा पत्र शशिकांतजी शिंदे यांच्याकडे पाठवले आहे. निंबाळकर यांनी आपल्या पत्रात २०१९च्या निवडणुकीचा उल्लेख केलाय.

मी आपल्यासोबत पक्षाच्या चांगल्या व अडी-अडचणीच्या काळात काम केले आहे. तसेच सन २०१९ ची विधानसभा (धाराशिव-कळंब) लढविली पण थोडक्यात पराभूत झालो. पक्षाने दिलेल्या संधीबद्दल आभारी आहे.परंतु काही अडचणीमुळे पक्षाचे यापुढील काम आपण करू शकत नाही, त्यामुळे मी माझ्या सक्रिय सदस्यत्वाचा व प्राथमिक सदस्यपदाचा राजीनामा आपणाकडे देत आहे, असं संजय निंबाळकर यांनी आपल्या राजीनामा पत्रात लिहिलंय.