Malvan: मालवणमध्ये मध्यरात्री राडा, कारमध्ये आढळले दीड लाख; भाजपच्या ३ नेत्यांविरोधात गुन्हा

Summary -

• नाकाबंदीदरम्यान भाजप पदाधिकाऱ्याच्या कारमध्ये दीड लाख रुपये सापडले

• निलेश राणे मध्यरात्री पोलिस ठाण्यात दाखल होऊन ठोस कारवाईची मागणी

• डीवायएसपी हस्तक्षेपानंतर तीन भाजप पदाधिकाऱ्यांवर गुन्हा दाखल

मालवणमध्ये पुन्हा एकदा भाजपच्या पदाधिकाऱ्याकडे पैसे सापडल्याचे समोर आले आहे. देवगड येथील भाजप पदाधिकाऱ्याच्या कारमध्ये रोख रक्कम आढळून आली. मालवण नगरपालिकेचा प्रचार संपल्यानंतर रात्री उशिरा नाकाबंदी वेळी पोलिसांनी भाजप पदाधिकाऱ्याची कार पोलिसांनी ताब्यात घेतली. याची माहिती मिळताच शिवसेना आमदार निलेश राणे यांनी पोलिस ठाण्यात धाव घेत गुन्हा दाखल करण्याची मागणी केली. जोपर्यंत गुन्हा दाखल होत नाही तोपर्यंत इथून हालणार नसल्याचा आक्रमक पवित्रा त्यांनी घेतला. त्यानंतर भाजपच्या ३ पदाधिकाऱ्यांविरोधात गुन्हा दाखल करण्यात आला.

मिळालेल्या माहितीनुसार, निवडणूक विभागाचे पथक आणि पोलिसांनी मालवण पिंपळपार येथे नाकाबंदीदरम्यान वाहनांची तपासणी केली. या तपासणी दरम्यान एका कारमध्ये सुमारे दीड लाख रुपयांची रोख रक्कम आणि काही पाकिटे आढळून आली. पुढील तपासासाठी ही कार मालवण पोलिस ठाण्यात आणण्यात आली होती. देवगड येथील भाजपा पदाधिकाऱ्यांची ही कार असून ते त्यावेळी कारमध्ये उपस्थित होते. त्यांची चौकशी करण्यात आली. यादरम्यान मालवण येथील दोन भाजपा पदाधिकारी त्याठिकाणी उपस्थित झाले.पोलिसांशी चर्चा करून कार सोडून देण्याबाबत चर्चा करण्यात आली.

याचवेळी त्याठिकाणी उपस्थित झालेल्या शिवसेना पदाधिकाऱ्यांनी याबाबतची माहिती आमदार निलेश राणे यांना दिली. आमदार निलेश राणे स्वतः कार घेऊन रात्री १२ वाजता मालवण पोलिस ठाण्यात पोहोचले. निलेश राणे यांनी या संपूर्ण प्रकरणी ठोस कारवाई होत नाही तोपर्यंत इथून हलणार नाही अशी भूमिका घेतली. निलेश राणे यांनी त्या ठिकाणी ठाण मांडले. तर ज्या कारमध्ये पैसे सापडले त्या कारमधील भाजपा पदाधिकारी आणि मालवण येथील भाजपा पदाधिकारी यांना पोलिसांनी पोलिस ठाण्यात थांबवून ठेवले होते.

दोन तासानंतर डिवायएसपी पोलिस ठाण्यात आले. कारवाई होणार असे त्यांनी सांगितले. मात्र तात्काळ कारवाई झाली पाहिजे या भूमिकेवर आमदार निलेश राणे ठाम होते. महेश नारकर देवगड भाजपा तालुकाध्यक्ष, बाबा परब भाजपा जिल्हा उपाध्यक्ष, अजिंक्य पाताडे आणि एक असे हे चार जण भाजपा पदाधिकारी असल्याचे निलेश राणे यांनी सांगितले. त्यानंतर काही तासांत प्रकरणी पोलिसांनी मालवणमधील भाजपच्या ३ पदाधिकाऱ्यांवर १७१ आणि ५० या कलमांतर्गत मालवण पोलिस ठाण्यात गुन्हा दाखल केला.