Nilesh Rane: मोठी बातमी! आमदार निलेश राणेंविरोधात गुन्हा, कोकणात राजकारण तापलं

Summary -

• आमदार निलेश राणेंविरोधात गुन्हा दाखल

• मालवण पोलिसांनी केला गुन्हा दाखल

• भाजप नेत्याच्या घरात घुसून छापा टाकल्याचा आरोप

• छाप्यात २५ लाख रुपये रोख सापडल्याने खळबळ

आमदार निलेश राणेंसंदर्भात मोठी बातमी समोर आली आहे. निलेश राणे यांच्याविरोधात गुन्हा दाखल करण्यात आला आहे. बेकायदेशीरपणे घरात घुसल्याप्रकरणी मालवण पोलिसांनी त्यांच्याविरोधात कारवाई केली. निलेश राणे यांनी भाजप नेत्याच्या घरात धाड टाकला होता यावेळी २५ लाख रुपयांची रोख रक्कम सापडली होती.

भाजपचे माजी तालुकाध्यक्ष विजय केनवडेकर यांच्या घरावर निलेश राणे यांनी छापा टाकला होता. या छाप्यामध्ये २५ लाखांची रोख रक्कम सापडली होती. त्यामुळे सिंधुदुर्गमधील राजकीय वर्तुळात खळबळ उडाली होती. निलेश राणे यांनी भाजप नेत्याच्या घरावर धाड टाकल्यानंतर भाजप आणि शिवसेनेमधील वाद शिगेला गेला. निलेश राणेंच्या आरोपांनंतर नितेश राणे हे देखील आक्रमक झाले होते. कोकणात दोन्ही राणे बंधू आता एकमेकांविरोधात उभे ठाकले आहेत.

निलेश राणे यांनी गुरुवारी सोशल मीडियावरून लाईव्ह करत मालवणमधील भाजप नेते विजय केनवडेकर यांच्या घरी धाड टाकली होती. यावेळी त्यांना घरात २५ लाखांची रोख रक्कम असलेली पैशांची बॅग आढळून आली होती. त्यांनी भाजपा पदाधिकाऱ्याच्या घरी धाड टाकत पोलखोल केल्यामुळे सिंधुदुर्गात एकच खळबळ उडाली आहे.

विजय केनवडेकर हे भाजपाचे स्थानिक नेते आहेत. त्यांच्या घरी गुरूवारी निलेश राणे आपल्या कार्यकर्त्यांसह गेले. निलेश राणे अचानक आल्यामुळे त्याठिकाणी उपस्थित असलेल्या विजय केनवडेकर आणि बंड्या सावंत या भाजपा कार्यकर्त्यांची एकच धावपळ झाली. त्याना काय करावे हेच कळत नव्हते.

यावेळी निलेश राणे म्हणाले, 'मी कुणाच्या बेडरूममध्ये जाणार नाही. पण जे काय आत आहे ते बाहेर आणा.' त्यानंतर कार्यकर्ते निलेश राणेंना बेडरूममध्ये घेवून गेले. त्यावेळी तिथे पैशांनी भरलेली बॅग आढळून आली होती. आता या प्रकरणीच त्यांच्याविरोधात गुन्हा दाखल करण्यात आला. बेकायदेशीरपणे कार्यकर्त्यांसह भाजप नेत्याच्या घरी घुसल्यामुळे त्यांच्याविरोधात कारवाई करण्यात आली.