Sanjay Raut News: 'तुमची फोटोबाजी तुमच्याकडे ठेवा...'; मराठा आरक्षणाच्या जाहिरातीवरून संजय राऊत शिंदे सरकारवर बरसले

Maharashtra Political News:

मराठा आरक्षणावरून राज्याचं राजकारण चांगलंच ढवळून निघालंय. अशात आज सर्व वृत्तपत्रांवर मराठा आरक्षणावरील सरकारची जाहिरात झळकली. या जाहिरातीवरून शिवसेना खसदार संजय राऊतांनी सरकारवर टीकास्त्र सोडलंय. या जाहिरीती कोणीही पाहत नाही. तुमची फोटोबाजी तुमच्याकडे ठेवा, असा टोला संजय राऊतांनी सरकारला लगावलाय. ('साम टीव्ही'चं व्हॉट्सअँप चॅनल जॉईन करण्यासाठी येथे क्लिक करा)

सरकारला आरक्षण द्यायचंय की नाही? याबाबत स्वत:ला मराठा समजणाऱ्या मुख्यमंत्री शिंदे आणि उपमुख्यमंत्री अजित पवारांनी समोर येऊन सांगायला हवं. आज आरक्षणासाठी तिसरी आत्महत्या झालीये. मनोज जरांगेंनी दिलेल्या कालावधीत ३ जणांनी आत्महत्या केल्या. मात्र सरकराच्या डोळ्यांची पापणीही हालली नाही, अशा शब्दांत संजय राऊतांनी टीका केलीये.

दिवाळी आधी वातावरण बिघडू शकतं

सरकार जाहिरीतींवर कोट्यावधी रुपये खर्च करत आहे. तुमच्या जाहिराती कोणीही वाचत नाही. नरेंद्र मोदी, देवेंद्र फडणवीस आणि एकनाथ शिंदे यांनी आपली जाहिरातबाजी आपल्याकडेच ठेवावी. सरकारमधील काही व्यक्ती वेगळ्याच दिशेने भूमिका घेतायत. त्यामुळे दिवाळी आधी वातावरण बिघडू शकतं, असा सूचक इशारा संजय राऊतांनी दिलाय.

मुख्यमंत्री आणि देवेंद्र फडणवीस मराठ्यांना आरक्षण देण्यासाठी फेल्युअर ठरलेत. अजित पवार तर आरक्षणावरून प्रश्न विचारल्यावर पळ काढतायत, आणि लोकं आत्महत्या करतायत. सरकार आणखी किती लोकांचा जीव घेणार?, असं संजय राऊत म्हणालेत.

काय आहे जाहिरातीत?

जाहिरातीत मराठा समाजाला 'धोरण आखले आहे तोरण बांधण्याचे! मराठा आरक्षण पूर्ण करण्याचे, पुन:श्च...मराठा समाजाच्या हक्काचे संविधानाच्या चौकटीत व न्यायालयाच्या प्रक्रियेत टिकणारे आरक्षण देण्यास शासन बांधिल आहे. असे लिहिले आहे, अशी जाहिरात आज सर्व वृत्तपत्रांमध्ये झळकलीये.