स्थानिक स्वराज्य संस्थांच्या निवडणुका कधी घेता येणार? निवडणूक आयोगानं तारखाच सांगितल्या

औरंगाबाद : राज्यातील मुदत संपलेल्या महानगरपालिका, नगरपालिका, नगरपंचायतींसह जिल्हा परिषद पंचायत समितीच्या निवडणुका (Local body election in maharashtra) कधी होणार असा प्रश्न अनेकांना पडला होता. मात्र आता हा प्रश्न लवकरच सुटणार आहे. कारण, स्थानिक स्वराज्य संस्थेच्या निवडणुका घेण्यास आमची यंत्रणा सज्ज आहे, असं निवडणुक आयोगाने (Election Commission) म्हटलं आहे. निवडणुक आयोगाने तसं पत्र प्रतिज्ञापत्रात सर्वोच्च न्यायालयात (Supreme Court) दिले आहे. राज्यात ज्या स्वराज्य संस्थांच्या निवडणुका प्रलंबित आहेत, त्याठिकाणी तत्काळ प्रक्रिया सुरू केल्यास मनपा निवडणुका घेणं शक्य असल्याचं निवडणुक आयोगाने प्रतिज्ञापत्रात सांगितलं आहे. (Maharashtra Local body elections 2022 News Updates)

इतकंच नाही तर, निवडणुक आयोगाने सर्वोच्च न्यायालयात सादर केलेल्या प्रतिज्ञापत्रात निवडणुकांच्या तारखा देखील सांगितल्या आहेत. त्यानुसार, नगरपालिका निवडणुका १७ जून, जिल्हा परिषद २२ जून,पंचायत समितीच्या निवडणुका ११ जुलै, आणि ग्रामपंचायतीच्या निवडणुका २ जुलै रोजी घेणे शक्य असल्याचे निवडणूक आयोगाने सांगितले आहे. राज्य निवडणूक आयोगाने एक वेळापत्रकच सादर केल्यामुळे निवडणुका बाबत येत्या ४ मे रोजी काय निर्णय होतो, याची आता उत्सुकता आहे.

दरम्यान, यावरआता सर्वोच्च न्यायालयात ४ मे रोजी सुनावणी होणार आहे. त्यावेळी प्रतिवादी राज्य शासन, राज्य निवडणूक आयोगाची पुढील सुनावणीची किंवा मुदतवाढीची विनंती मान्य करता येणार नाही, असे सर्वोच्च न्यायालयाने म्हटले आहे. राज्य शासनाने ११ मार्च रोजी प्रभागरचनेचे अधिकार स्वतःकडे ठेवणारा कायदा मंजूर केला असून त्याला आव्हान देणारी याचिका औरंगाबादच्या पवन शिंदे आणि इतरांनी अडव्होकेट सुधांशू चौधरी, देवदत्त पालोदकर, आडगावकर यांच्यामार्फत सर्वोच्च न्यायालयात दाखल केली आहे.

Edited By - Satish Daud