UPSC ची तयारी करणाऱ्या तरुणावर अ‍ॅसिड हल्ला, मारहाणीनंतर जंगलात फेकलं; VIDEO

Buldhana : यूपीएससीची तयारी करणाऱ्या एका तरुणावर दोघांनी क्रूर हल्ला केला. तरुणाला बेदम मारहाण केल्यानंतर दोन्ही आरोपींनी त्याच्यावर अ‍ॅसिड हल्ला केला. तरुण बेशुद्ध पडल्यानंतर त्याला आरोपींनी रस्त्याजवळ असलेल्या जंगल परिसरात टाकून दिले. तरुणावर सध्या अकोल्याच्या शासकीय रुग्णालयात उपचार सुरु आहेत. ही भयावह घटना बुलढाणा जिल्ह्यामध्ये घडली आहे.

मिळालेल्या माहितीनुसार, बुलढाणा जिल्ह्यातील खामगाव अकोला रस्त्यावर ही घटना घडली आहे. ज्या तरुणावर अ‍ॅसिड हल्ला झाला, त्याचे नाव अमोल हनुमंत इसाळ असे आहे. मूळचा यवतमाळचा असलेला अमोल अमरावतीत यूपीएसीची तयारी करत होता. अमोल खामगावहून अकोल्याकडे जात असताना दोन अज्ञात व्यक्तींनी त्याला अडवले. त्यानंतर लाठ्याकाठ्यांनी अमोलला मारहाण करण्यात आली.

मारहाण केल्यानंतर अज्ञातांनी अमोलच्या चेहऱ्यावर आणि अंगावर अ‍ॅसिड ओतले. अमोल बेशुद्ध पडल्यानंतर रस्त्याच्या लगत असलेल्या जंगल परिसरात त्याला टाकून आरोपी फरार झाले. रात्रभर अमोल बेशुद्ध अवस्थेत जंगलात पडून होता. सकाळी त्याला जाग आली. तेव्हा तो निर्वस्त्र आणि जखमी अवस्थेत रस्त्यावर आला. स्थानिक नागरिकांनी याची माहिती पोलिसांंना दिली.

अमोलला पुढील उपचारांसाठी अकोल्यातील रुग्णालयात दाखल करण्यात आले आहे. अ‍ॅसिड हल्ल्यामुळे अमोलला मोठी दुखापत झाली आहे, तो गंभीररित्या भाजला गेल्याची माहिती समोर आळी आहे. या प्रकरणी खामगावर पोलीस स्थानकामध्ये गुन्हे दाखल करण्यात आले आहेत. हा हल्ला अमोलच्या रुम पार्टनरनेच केल्याचा दावा अमोलच्या भावाने केला आहे.