Maharashtra Accident : आचाेळे फाट्यावर बस, मालवाहू ट्रक अपघातात ५ जखमी; उलवे उड्डाणपुलावरही भीषण अपघात

मनोज जयस्वाल / अजय सोनवणे / सिद्धेश म्हात्रे / शुभम देशमुख

Accident News :

नाशिकच्या निफाड जवळ एसटी महामंडळाच्या रातराणी बस व मालवाहू ट्रक मध्ये झालेल्या अपघातात ५ जण जखमी झाले आहेत. ही घटना नाशिक- छत्रपती संभाजी महामार्गावरील निफाडच्या आचोळे फाट्यावर शु्क्रवारी पहाटेच्या सुमारास घडली. दरम्यान राज्यातील विविध जिल्ह्यांत झालेल्या अपघातात एक जण ठार तर सात जण जखमी झाले आहेत. (Maharashtra News)

भुयार मार्गावर अपघात

औषधी घेऊन गावाकडे लाखांदूर तालुक्यातील भुयार येथून स्वागवी निमगाव (ता.पवनी) येथे येत असतांना समोरून येणाऱ्या चारचाकी वाहनाने दुचाकीला धडक दिल्याची घटना निष्ठी - भुयार मार्गावर घडली. या घटनेत एकाचा जागीच मृत्यू झाला तर दोघे जण गंभीररीत्या जखमी झाले आहेत. पाेलीसांकडून मिळालेल्या माहितीनूसार या घटनेत अक्षय डडमल यांचा मृत्यू झाला आहे.

समृद्धी महामार्गावर ट्रक पलटी

समृद्धी महामार्गावर (samruddhi mahamarg) अपघाताची मालिका सुरूच असून वाशिमच्या मालेगाव तालुक्यातील वणोजा परिसरातील लोकेशन २१९ वर कांदा घेवुन जाणारा ट्रक डिव्हायडरवर धडकत पलटी झाला. या घटनेत ट्रक चालक किरकोळ जखमी झाला आहे.

रातराणी बस व मालवाहू ट्रक अपघातात ५ जखमी

नाशिकच्या निफाड जवळ एसटी महामंडळाच्या रातराणी बस व मालवाहू ट्रक यामध्ये अपघात झाला. या अपघातात ५ जण जखमी झाले आहेत. ही घटना नाशिक- छत्रपती संभाजी महामार्गावरील निफाडच्या आचोळे फाट्यावर शुक्रवारी पहाटेच्या सुमारास घडली.

या अपघाताबाबत मिळालेली माहिती अशी : एसटी बसने मालवाहू ट्रकला पाठीमागून धडक दिली. या अपघातामध्ये बसमधील चालक व दोन प्रवासी जखमी झाले. तसेच ट्रक देखील पलटी झाल्याने चालक व क्लिनर हे दोघे देखील जखमी झाले. जखमींना उपचारार्थ रुग्णालयात दाखल करण्यात आले आहे. या बस मध्ये 65 प्रवासी होते. ही बस पुसद वरून मुंबईकडे जात असताना हा अपघात झाल्याची माहिती घटनास्थळावरुन मिळाली.

उलवे उड्डाणपुलावर अपघात

नवी मुंबईतील बेलापूर उरण मार्गांवर उलवे उड्डाणपुलावर एका चार चाकीचा आणि कंटेनरचा रात्रीच्या सुमारास अपघात झाला. या अपघातात 3 ते 4 जण गंभीर जखमी असल्याची प्राथमिक माहिती उपलब्ध झाली आहे.

Edited By : Siddharth Latkar