Shiv Sena: उद्धव ठाकरेंना कोकण दौऱ्याआधीच मोठा धक्का; बड्या आमदाराचा भाजपमध्ये प्रवेश

Suryakant Dalvi News :

आगामी लोकसभा निवडणुकीत यश मिळवण्यासाठी सर्वच पक्ष कामाला लागले आहेत. अशात शिवसेना उद्धव बाळासाहेब ठाकरे गटाचे प्रमुख उद्धव ठाकरे येत्या 4 फेब्रुवारीला सिंधुदुर्ग दौऱ्यावर आहेत. मात्र कोकण दौऱ्याआधीच उद्धव ठाकरेंना मोठा धक्का मिळालाय.

बाळासाहेब ठाकरेंचे निष्ठावंत शिवसैनिक म्हणून ओळख असलेले आमदार सूर्यकांत दळवी आज भाजपमध्ये पक्ष प्रवेश करणार आहेत. १९९० ते २०१४ या काळात दापोलीतून शिवसेनेचे आमदार असलेले सूर्यकांत दळवी आज ठाकरे गटाला जय महाराष्ट्र करणार आहेत.

दुपारी १ वाजता भाजप प्रदेश कार्यालयात भाजपचे प्रदेशाध्यक्ष चंद्रशेखर बावनकुळे यांच्या उपस्थितीत सूर्यकांत दळवी यांचा पक्षप्रवेश होणार आहे.

उबाठा पक्षप्रमुख उद्धव ठाकरे आजपासून कोकण दौऱ्यावर आहेत. 4 फेब्रुवारीला ते सिंधुदुर्ग आणि 5 फेब्रुवारीला रत्नागिरीत असणार आहेत. रत्नागिरीतील तीन विधानसभा मतदारसंघात उद्धव ठाकरेंचा दौरा असणार आहे. निवडणुकीच्या पार्श्वभूमीवर उद्धव ठाकरे यांचा कोकण दौरा महत्त्वाचा ठरणार आहे. मात्र त्याआधीच सूर्यकांत दळवींनी भाजपमध्ये सहभागी होण्याचा निर्णय घेतलाय. त्यामुळे उद्धव ठाकरेंसाठी हा मोठा धक्का मानला जातोय.