Kolhapur Jotiba Chaitra Yatra : चैत्र यात्रेत जोतिबाला जाणार आहात ? वाचा नवे निर्बंध

- रणजित माजगावकर

Kolhapur News : दख्खनचा राजा श्री जोतिबा मंदिरात नारळाचे केसर काढण्यास, खोबऱ्यांची वाटी उधळण्यास मनाई करण्यात आली आहे. व्यापाऱ्यांनी केसर काढून नारळ, खोबऱ्यांचे तुकडे करून विक्री करावी असा आदेश जिल्हा प्रशासनाने काढला आहे. (Breaking Marathi News)

चैत्र यात्रेत जोतिबा मंदिरात (Jotiba Chaitra Yatra) भाविकांची माेठी गर्दी असते. केसर काढून नारळ फोडताना केसराचा ढीग पडतो. हा ढिग लवकर बाजूला होत नाही. त्यामुळे भाविकांची अडचण होते. तसेच यात्रेत गुलाल- खोबरे मोठ्या प्रमाणात उधळण्यात येते. यामध्ये अखंड खोबऱ्यांची वाटी सुद्धा पालखी, सासनकाठीवर उधळली जाते.

अखंड खोबऱ्यांची वाटीमुळे भाविक जखमी होतात. उंचीवरून व लांबून आलेल्या खोबऱ्यांच्या वाटीचा मार भाविकांना जोरात बसतो. यावर उपाय म्हणून प्रशासनाने जोतिबा मंदिरात नारळाचे केसर काढणे आणि दुकानात खोबऱ्यांची वाटी विक्रीस मनाई केली आहे. व्यापाऱ्यांनी केसर काढून आणि खोबऱ्यांचे तुकडे करून विक्री करण्याचे आदेश दिले आहेत.

सहकार्याची अपेक्षा

साम टीव्हीशी बाेलताना तहसीलदार रमेश शेंडगे (tashildar ramesh shendge) म्हणाले नारळाचा कचरा पडतो. नारळपाणी सांडून भाविक घसरून पडतात. हे टाळण्यासाठी नारळ केसर काढून देण्याबाबत आदेश दिला आहे. व्यापारी, दुकानदार आणि भाविकांनी सहकार्य करून यात्रा सुरळीत पार पाडावी.

Edited By : Siddharth Latkar