पोल्ट्री फार्ममध्ये सुरू होता काळा धंदा! आत गेल्यावर अधिकाऱ्यांनाही बसला धक्का

राज्याच्या अँटी नार्कोटिक्स टास्क फोर्सने कोल्हापूर जिल्ह्यात मोठी कारवाई करत चंदगड तालुक्यातील हाजगोळी येथील एका पोल्ट्री फार्ममध्ये सुरू असलेला एमडी ड्रग्स निर्मितीचा गुप्त कारखाना उद्ध्वस्त केला आहे. या कारवाईत तब्बल 1 कोटी 13 लाख रुपयांचा मुद्देमाल जप्त करण्यात आला असून 5 ते 6 जणांना अटक करण्यात आल्याची माहिती आहे. मीरा रोड मधील नया नगर पोलिस ठाण्यात २ करोड रुपये किंमतीचे ड्रग्स तस्करी प्रकरणात गुन्हा दाखल करण्यात आला होता. या प्रकरणाचा तपास करत असताना यातील इरफान खान या तरुणाला अटक करण्यात आली होती. त्याच्याकडे चौकशी केली असता त्याने कोल्हापूरमध्ये पप्पू मालवडर याच्या मालकीच्या असलेल्या पोल्ट्री फार्ममध्ये अमली पदार्थांचे उत्पादन सुरू केलं होतं.

तपासादरम्यान इरफान खानकडे चौकशी करण्यात आली असता त्याने कोल्हापूर जिल्हयातील चंदगड तालुक्यातील हाजगोळी येथे पप्पू मालवडकर यांच्या मालकीच्या पोल्ट्री फार्ममध्ये अमली पदार्थांचे उत्पादन सुरू असल्याची माहिती दिली. या माहितीच्या आधारे अँटी नार्कोटिक्स टास्क फोर्सच्या पथकाने पोल्ट्री फार्मवर छापा टाकला. कारवाईदरम्यान घटनास्थळी सुरू असलेला क्लँडेस्टाईन अर्थात गुप्त ड्रग्स कारखाना उद्ध्वस्त करण्यात आला. पोल्ट्री फार्ममधून सुमारे 208 ग्रॅम तयार एमडी ड्रग्स, 70 लिटर मोनोमिथाईल अमाईन, 2-ब्रोमो केमिकल पावडर तसेच ड्रग्स निर्मितीसाठी वापरले जाणारे प्रयोगशाळेचे साहित्य असा एकूण 1 कोटी 13 लाख रुपयांचा मुद्देमाल जप्त करण्यात आला.

या प्रकरणात आतापर्यंत 5 ते 6 जणांना अटक करण्यात आली असून, या ड्रग्स रॅकेटमध्ये आणखी कोणाचा सहभाग आहे का, तसेच या कारखान्यातून तयार होणारे अमली पदार्थ कुठे आणि कोणाला पुरवले जात होते, याचा तपास अँटी नार्कोटिक्स टास्क फोर्सकडून सुरू आहे.