कोल्हापूरमध्ये स्मशानभूमीत काळीजादूचा प्रकार, महिला आणि पुरुष नग्नावस्थेत करायचे करणी, भानामती; घटना सीसीटीव्हीत कैद

रणजीत माजगावकर, साम टीव्ही, प्रतिनिधी

कोल्हापूर जिल्ह्यातील शिरोळ तालुक्यातील उदगाव येथे स्मशानभूमीत अंधश्रद्धेचा धक्कादायक प्रकार उघडकीस आला आहे. महिला आणि पुरुषांकडून नग्न होऊन करणी, भानामतीसारखी अघोरी कृत्ये केली जात असल्याचे समोर आले आहे. हा संपूर्ण प्रकार सीसीटीव्ही कॅमेऱ्यामध्ये कैद झाला आहे. या घटनेमुळे परिसरात खळबळ उडाली आहे.

उदगावच्या स्मशानभूमीत अघोरी प्रकार सुरु असल्याचे सीसीटीव्ही कॅमेऱ्यात कैद झाला. कारवाईसाठी हे सीसीटीव्ही फुटेज पोलिसांनी ताब्यात घेतल्याची प्राथमिक माहिती समोर आली आहे. उदगावमधील कृष्णा नदीकाठावर असलेल्या वैकुंठधाम स्मशानभूमीत मागील काही दिवसांपासून हा धक्कादायक प्रकार सुरु होता.

कृष्णा नदीकाठावर घाटावर महिला आणि पुरुष भरदिवसा नग्न होऊन करणी, भानामतीसारखे विधी करत होते. स्मशानभूमीतील अंत्यसंस्कार केलेल्या जागेवरील रक्षा बाजूला सारून त्याठिकाणी बाहुली, नारळ यांची पूजा केली जात होती. नावाच्या चिठ्ठयांना सुया टोचून करणी करण्याचा प्रकारही उघडकीस आला आहे.

स्मशानभूमीतील सीसीटीव्ही कॅमेऱ्यात हा संपूर्ण प्रकार कैद झाला. सीसीटीव्ही फुटेजच्या आधारे पोलीस अधिक तपास करत असल्याची प्राथमिक माहिती समोर आली आहे. करणी, भानामतीसारखे अघोरी प्रकार सुरु असल्याची माहिती समोर आल्याने उदगाव पंचक्रोशीत खळबळ उडाली आहे. सदर सीसीटीव्ही फुटेज सोशल मीडियावर व्हायरल होत आहे.