Maharashtra Politics: लोकसभेत फटका, विधानसभेत सावध पवित्रा! भाजपने विधानसभेसाठी काय केली आहे मायक्रो प्लॅनिंग? जाणून घ्या

लोकसभा निवडणुकीत महायुतीला राज्यात मोठा फटका बसल्यानंतर आता खुद्द केंद्रीय गृहमंत्री अमित शहा यांनी महाराष्ट्रावर लक्ष केंद्रित केलंय. विधानसभा निवडणुकीच्या पार्श्वभूमीवर अमित शाहांनी महाराष्ट्रात बैठकांचा धडाका लावलाय. नुकताच अमित शहा यांनी विदर्भ, मराठवाडा, उत्तर महाराष्ट्र दौरा केला. यानंतर आता अमित शाहांच्या टार्गेटवर मुंबई असल्याची माहिती सुत्रांनी दिली.

विधानसभा निवडणुकांच्या मोर्चेबांधणीसाठी केंद्रीय गृहमंत्री अमित शाह महाराष्ट्र दौऱ्यावर आले होते. या दौऱ्यात अमित शाहांनी निवडणुकीची रणनिती मांडताना शरद पवार आणि उद्धव ठाकरेंना रोखायचं, अशा सूचना कार्यकर्त्यांना दिल्या.

तसेच आपल्याला उद्धव ठाकरे, शरद पवारांचे राजकारण संपवायचे आहे, असेही त्यांनी म्हटले. यानंतर आता अमित शहा यांनी मुंबईवर टार्गेट केलंय.

मुंबईसाठी अमित शहांचं विशेष प्लॅनिंग

अमित शहा यांनी मुंबईतील डेंजर झोनमधील मतदारासंघांचा विभागनिहाय आढावा घेतल्याचं सूत्रांनी सांगितलं आहे. ते मुंबईत कार्यकर्त्यांशी संवाद साधणार आहेत. पुढील 3 दिवस मतदारसंघ पिंजून काढा, पदाधिकाऱ्यांना आदेश त्यांनी असे आदेश दिले आहेत. मुंबईतील प्रत्येक विधानसभा मतदारसंघाचा रिपोर्ट तयार करा, असंही त्यांनी कार्यकर्त्यांना सांगितलं असल्याचं सूत्रांचं म्हणणं आहे.

लोकसभेला तोंड पोळलेल्या महायुतीनं आणि विशेषतः भाजपनं विधानसभा निवडणुकांसाठी कंबर कसलीये. त्यामुळे विधानसभेसाठी भाजप मायक्रो प्लॅनिंग करतयं. एकेका जागेवर भाजप लक्षकेंद्रीत करताना दिसतंय. यासाठी संघही भाजपसाठी मैदानात उतरलायं. त्यामुळे आगामी विधानसभेची गणितं बदलून भाजप इतिहास घडवणार का हेच पाहायचं..