Maharashtra Politics :...तर सोलापुरातून तिरुपतीसाठीही विमान सेवा सुरू होणार; जयकुमार गोरेंचा प्रणिती शिंदेंना टोला

सोलापूर शहरातून सोलापूर-गोवा विमानसेवा सुरू झाल्यामुळे काहींना चुकीचे काहीतरी घडेल असे वाटत होते. परंतु तसे काही घडलेले नाही. ऑगस्टमध्ये मुंबईची विमानसेवा सुरू होईल. त्यानंतर तिरूपतीसाठी सुरू होईल, असे पालकमंत्री जयकुमार गोरे यांनी सांगितले. भाजपचे आमदार देवेंद्र कोठे यांनी कर्णिक नगर येथे 14 कोटी रुपयांच्या कामांचा शुभारंभ केला. यानिमित्त आयोजित कार्यक्रमात ते बोलत होते.

पालकमंत्री गोरे म्हणाले, आमदार म्हणून देवेंद्र कोठे शहरातील विविध समस्यांचा सातत्याने पाठपुरावा करीत असतात. पाणीपुरवठ्याचा प्रश्न झाला की त्यांनी विमानसेवेबद्दल पाठपुरावा केला. आता गोव्याची विमानसेवा झाल्यानंतर मुंबईची सेवा सुरू करा, म्हणून सांगितले. मुंबई विमान सेवा ऑगस्टमध्ये सुरू होत आहे. तिरूपतीसाठी होणार आहे.

काँग्रेसच्या खासदार प्रणिती शिंदे यांनी गोवा विमानसेवेमुळे तस्करी वाढेल, अशी भीती व्यक्त केली होती. खासदार शिंदे यांचे नाव न घेता पालकमंत्र्यांनी गोवा विमानसेवेमुळे असे काही घडले नाही, असा टोला लगावला.

सोलापूर महापालिकेच्या महापौरपदावर भाजपचा दावा

सोलापूर महानगरपालिकेच्या निवडणुका डोळ्यासमोर ठेवून सोलापूर शहरातील विकास कामाचा भाजप नेत्यांकडून झपाटा लावला आहे. सोलापूर महानगरपालिकेच्या महापौरपदावर भाजप पक्षाकडून आताच दावा सांगितला जात आहे. पालकमंत्री जयकुमार गोरे आणि सोलापूर शहर मध्यचे भाजप आमदार देवेंद्र कोठे यांच्याकडून महायुतीतून भाजपचाच महापौर करण्याचा निर्धार केला आहे. सोलापूर शहर भाजपकडून महानगरपालिकेच्या निवडणुकीसाठी जोरदार तयारी सुरू केली आहे.