Samruddhi Mahamarg : समृद्धी महामार्गात बाधित होणाऱ्या शेतकऱ्यांचा रास्ता रोको; जालना- मंठा रोडवर वाहनांच्या रांगा

अक्षय शिंदे 
जालना : जालना- नांदेड समृद्धी महामार्गाची संपादित होणाऱ्या जमिनीला योग्य मोबदला देण्याची मागणीसाठी जालन्यातील देवमूर्ती येथे मागील महिन्याभरापासून समृद्धीत बाधित होणाऱ्या शेतकऱ्यांचे आंदोलन सुरू आहे. या आंदोलनाला पाठिंबा म्हणून जालन्यातील मंठा जालना रोडवरील सिंधी काळेगाव फाटा येथे शेतकऱ्यांनी आज रस्ता रोको आंदोलन सुरू केले आहे. शेतकऱ्यांच्या रास्ता रोको आंदोलनामुळे जालना मंठा रोडवर वाहनांच्या लांबच लांब रांगा लागलेल्या पाहायला मिळत आहे.

नागपूर ते मुंबई असा तयार होत असलेल्या समृद्धी महामार्गाच्या पहिल्या टप्प्याचे काम झाले असून दुसऱ्या टप्पाचे काम सुरु आहे. यासाठी अजूनही शेतकऱ्यांच्या जमिनी संपादित करण्याची प्रक्रिया सुरु आहे. मात्र महामार्गाची जात असलेल्या जमिनींसाठी योग्य मोबदला शेतकऱ्यांना मिळत नसल्याचा आरोप आहे. यामुळे जालना- नांदेड दरम्यानच्या मार्गासाठी संपादित जमिनीसाठी चांगला मोबदला मिळावा अशी मागणी शेतकऱ्यांकडून केली जात आहे. 

या आहेत शेतकऱ्यांच्या मागण्या 

समृद्धी महामार्गात बाधित होणाऱ्या जमिनीला जास्त नको, पण जास्त भाव द्या. सर्वाधिक बाजारभावाच्या पाचपट जमिनीला मोबदला द्या. २०२२ मध्ये विविध विभागांनी केलेल्या संयुक्त मोजणीप्रमाणे दिलेल्या मुलांकनानुसार मागे जाण्यात यावा. तर २०२३ मध्ये निघालेला KML चा २०२१ च्या अधिसूचनेला लागू करण्यात येऊ नये, सदरील जीआर या प्रकल्पासाठी रद्द करण्यात यावा. याप्रमुख मागण्यांसह शेतकऱ्यांनी जालना मंठा रोडवरील सिंधी गाळेगाव फाटा येथे रास्ता रोको आंदोलन केले.

दखल न घेतल्यास तीव्र आंदोलनाचा इशारा
मागील महिनाभरापासून समृद्धी महामार्गात बाधित होणाऱ्या शेतकऱ्यांचे जालन्यातील देवमूर्ती येथे आंदोलन सुरू आहे. या आंदोलनाची दखल न घेतल्यामुळे आज शेतकऱ्यांनी जालना- मंठा रोडवरील सिंधी काळेगाव फाटा येथे रस्ता रोको आंदोलन केले आहे. दरम्यान शासनाने लवकरात लवकर आंदोलनाची दखल न घेतल्यास यापेक्षाही तीव्र आंदोलन करू; असा इशारा शेतकऱ्यांनी दिला आहे.