कापसाला भाव..शेतातून होतेय कापसाची चोरी

पाल (जळगाव) : भुरट्या चोरांनी अतिशय धुमाकूळ घातला असून शेतात वेचणी करून ठेवलेले कापसाचे गाठोडे चक्क चोरून गायब करण्याची घटना घडत आहे. (jalgaon-news-Prices-of-cotton-but-farmer-cotton-is-stolen-from-the-fields)

पाल परिसरात काही दिवसांपासून शेतातील हंगाम काढणीच्या कामाला वेग आला आहे. भुईमूग, सोयाबीन, मका, ज्वारी व कापूस काढणीस शेतकरी धावपळ करत असून जेमतेम करून शेतातील हंगाम घरात आणण्याचा प्रयत्न बळीराजा करत आहे. आधीच सर्वच कामे एकत्र आल्याने मंजूरही मिळणे कठीण झाले असुन त्यात चोरांनी शेतात धुमाकूळ घातला आहे. आधीच शेतातील हंगाम अति पावसामुळे खराब झाले असून यावर्षी शेतात लावलेला खर्च सुध्दा निघणार नसून यात भुरटे चोर सक्रिय झाले असून शेतकऱ्यांचे अतिशय हाल होत आहे

वेचणी केलेला कापुस चोरला

पाल येथील सोहेल शब्बीर अहमद यांच्या शेतात पंधरा मजूर कापूस वेचणीस गेले होते. या मजुरांनी काढलेल्या कापसाची गाठोडे कडुनिंबाच्या झाडाखाली ठेवली होती. मात्र दुपारच्या वेळी अज्ञात चोरांनी चक्क वेचणी केलेला कापुसाचे गाठोडे शेतातुन चोरून नेले आहे. यामुळे शेतकरीचे मोठे नुकसान झाले आहे.

या शेतकऱ्यांच्या शेतीतून गाठोडे चोरी

आठवडाभरापासून शेतातील कापसाचे गाठोडे चोरीच्या घटनेत वाढ होत असून भिमसिंग चतरु चव्हाण, डॉ. शब्बीर शेख, नवलसिंग पिता चव्हाण, अभेराम मैताब पवार आणि प्रमोद भंगाळे यांच्या शेताच्या बांधावर ठेवलेले कापूसाचे गाठोडे रविवारी दुपार एक वाजेच्या सुमारास लंपास करण्यात आले.