Amalner Accident : बसची दुचाकीला जोरदार धडक; वृद्धाचा जागीच मृत्यू

अमळनेर (जळगाव) : देवगाव- देवळी गावाच्या खडकी नाल्याजवळ भरधाव बसने दुचाकीला मागून जोरदार धडक दिली. यामुळे झालेल्या अपघातात दुचाकीस्वाराचा जागीच मृत्यू झाला. सदरचा अपघात ३० ऑक्टोम्बरला सकाळच्या सुमारास घडला. या प्रकरणी पोलिसात नोंद करण्यात आली आहे. 

चोपडा (Chopda) तालुक्यातील खाचणे येथील भानुदास पुंडलिक पाटील (वय ६४) हे खाचणे येथून कामानिमित्त दुचाकीने अमळनेरकडे जात होते. या दरम्यान देवगाव- देवळी फाट्याजवळ चोपड्याहून बदलापूरकडे जाणाऱ्या बसचालकाने दुचाकीला मागून जोरदार धडक (Accident) दिली. यात भानुदास पाटील रस्त्यावर दूरवर फेकले गेले. त्यांच्या डोक्याला, चेहऱ्याला व हाताला गंभीर दुखापत झाली. त्यांना अमळनेर ग्रामीण रुग्णालयात दाखल केले. तेथे डॉक्टरांनी त्यांना मृत घोषित केले. 

दिवाळीत कुटुंबावर दुःखाचा डोंगर 

बसने दिलेल्या धडकेत दुचाकीस्वाराचा मृत्यू झाला. कुटुंबातील करता व्यक्ती गेल्याने ऐन दिवाळी सणाच्या उत्सवात कुटुंबावर दुःखाचा डोंगर कोसळला आहे. दरम्यान भानुदास पाटील यांच्या चुलत भावाच्या फिर्यादीवरून बसचालक शेख मिनाजोद्दीन जहिरोद्दीन (रा. अडावद, ता. चोपडा) याच्याविरोधात अमळनेर पोलिस ठाण्यात गुन्हा दाखल झाला आहे. हवालदार सुनील पाटील तपास करीत आहेत.