ओबीसी आरक्षणावरून भाजपमध्ये अंतर्गत मतभेद हे दुर्दैव - सानप

बीड - केंद्रातील भाजप आणि राज्यातील भाजपमध्ये, ओबीसी आरक्षणावरून मतभेद दिसत आहेत. राज्यातील भाजप ओबीसी आरक्षणावरून आंदोलन करत आहे. तर केंद्रातील भाजप सरकारने ओबीसींची जनगणना होणार नाही, असं स्पष्ट केलं आहे. त्यामुळे ओबीसी आरक्षणावरून, भाजपमध्ये अंतर्गत मतभेद आहेत. हे अतिशय दुर्दैव म्हणावं लागेल. जर ओबीसी आरक्षणाचा प्रश्न सुटला नाही, तर गल्लीपासून दिल्लीपर्यंत आंदोलन करू. असा सज्जड इशारा ओबीसी नेते बाळासाहेब सानप यांनी बीडमधून दिला आहे. ते ओबीसी जागर मेळावा समारोप कार्यक्रमात बोलत होते.

हे देखील पहा -

केंद्र सरकारने ओबीसी समाजाची जनगणना होणार नाही. असं स्पष्ट केल्यानंतर आता मराठवाड्यातील ओबीसी नेते आक्रमक झाले आहेत. तर याच ओबीसी आरक्षणाच्या मुद्यावर जय भगवान संघाच्यावतीने, ओबीसी नेते बाळासाहेब सानप यांनी, मराठवाड्यात विविध संघटना एकत्र करत, ओबीसी जनजागरण मोहीम सुरू केली आहे. जालना, परभणी, हिंगोली, लातूर, उस्मानाबादमध्ये मेळावा झाल्यानंतर, आज बीडमध्ये या मेळाव्याचा समारोप झाला.

या मेळाव्यामधून विविध संघटनेच्या नेत्यांनी केंद्रातील भाजप सरकार विरोधात तीव्र संताप व्यक्त केला. यावेळी आंदोलनाची पुढील दिशा देखील ठरवण्यात आली आहे. जर सरकारने याची दखल घेतली नाही. तर राज्यभर तीव्र आंदोलने, रस्ता रोको करण्यात येतील. असा इशारा देखील बाळासाहेब सानप यांनी दिला आहे.

Edited By : Krushnarav Sathe