आज आयएमएचे कामबंद; शिकाऊ डाॅक्टरांनी काढला कँडल मार्च

-- संजय राठोड

यवतमाळ : आयएमए च्या वतीने डॉक्टर अशोक पाल यांना आज श्रद्धांजली वाहण्यात आली. खऱ्या मारेकऱ्यांना तातडीने अटक करण्यात यावी, या मागणीसाठी शनिवार, दि. १३ नोव्हेंबरला एक दिवस कामबंद आंदोलनाचा निर्णय आयएमएने घेतला आहे. या आंदोलना दरम्यान अत्यावश्यक सेवा सुरू राहणार आहेत.

हे देखील पहा :

यवतमाळ येथील वसंतराव नाईक शासकीय वैद्यकीय महाविद्यालयाच्या अंतिम वर्षात शिक्षण घेणारे विद्यार्थी अशोक पाल यांची बुधवारी रुग्णालय परिसरात हत्त्या झाल्या नंतर विद्यार्थ्यांमध्ये प्रशासनाविरोधात तीव्र संतापाची लाट पसरली आहे. या घटनेचा निषेध करत तीन दिवसांपासून विद्यार्थ्यांनी आंदोलनाचे हत्यार उपसले आहे.

या घटनेतील आरोपीला अटक होईपर्यंत आंदोलन मागे न घेण्याचा निर्णय विद्यार्थ्यांनी घेतला असून डाॅक्टर अशोक पाल यांना श्रद्धांजली वाहण्यासाठी महाविद्यालयातील विध्यार्थी विद्यार्थिनींनी काल रात्री कँडल मार्च काढला. यावेळी जवळ पास तीनशे विद्यार्थी या कँडल मार्च मध्ये सहभागी झाले होते. हा कँडल मार्च आंदोलन स्थळावरून घटना स्थळपर्यंत गेला. त्या नंतर त्याठिकाणी श्रद्धांजली अर्पण करण्यात आली.

Edited By : Krushnarav Sathe