HMPV चा महाराष्ट्रातही शिरकाव; राज्यात टास्क फोर्सची स्थापना

भरत मोहळकर, साम प्रतिनिधी

चीनमध्ये धुमाकूळ घालणाऱा HMPV व्हायरस आता महाराष्ट्रात धडकलाय. नागपूरमध्ये या व्हायरसचे दोन रुग्ण आढळून आले आहेत. विशेष म्हणजे दोन्ही रुग्ण हे लहानगेच आहेत. त्यामुळे पालकांना आपल्या मुलांची अधिक काळजी घ्यावी लागणार आहे. यामुळे मात्र राज्य सरकार अलर्ट मोडवर आलंय. यावरचाच हा विशेष रिपोर्ट.

चीनमध्ये धुमाकूळ घातलेल्या HMPV ने भारताच्या चिंता वाढवल्या आहेत. आतापर्यंत देशभरात 8 रुग्ण आढळले असून या विषाणूचा महाराष्ट्रातही शिरकाव झालाय. नागपूरमध्ये 7 वर्षीय मुलगा आणि 13 वर्षीय मुलीला HMPV ची लागण झाल्याची माहिती समोर आलीय.. या पार्श्वभुमीवर सरकार अलर्ट मोडवर आलं असून जे. जे हॉस्पिटल्सच्या अधिष्ठाता डॉ. पल्लवी सापळेंच्या अध्यक्षतेखाली टास्क फोर्सची स्थापना करण्यात आलीय.

कर्नाटक, गुजरात, पश्चिम बंगाल आणि तमिळनाडू पाठोपाठ महाराष्ट्रातही या विषाणूने हातपाय पसरले आहेत. या विषाणूची लक्षणं काय आहेत? पाहूयात.

HMPV ची लक्षणं

सर्दी

खोकला

ताप

घसा खवखवणे

धाप लागणे

जुलाब

अंगावर पुरळ

कोरोना सदृश्य विषाणू महाराष्ट्रात धडकल्याने आता राज्यातील हॉस्पिटल्स या महासंकटाचा सामना करण्यासाठी सज्ज झाली आहेत. दुसरीकड् आरोग्य खात्याने नागरिकांसाठीही नियमावली जारी केलीय... HMPVपासून वाचण्यासाठी नेमकं काय टाळायला हवं? पाहूयात.

काय करू नये?

डोळे, नाक आणि तोंडाला स्पर्श करणं टाळा

कुणाशीही हस्तांदोलन करू नका

सार्वजनिक ठिकाणी थुंकू नका

ताप, खोकला आणि शिंका येत असल्यास गर्दीच्या ठिकाणी जाऊ नका

डॉक्टरांच्या सल्ल्याशिवाय औषधं घेऊ नका

कोरोना संसर्गामुळे तब्बल साडेपाच लाख लोकांचा जीव गेला. त्यानंतर आता चीनमधून आलेल्या HMPV या नव्या विषाणू पासून लहान मुलं आणि वृद्धांना वाचवण्यासाठी प्रत्येकाने नियम पाळायला हवेत...अन्यथा कोरोना प्रमाणेच आताही HMPV मुळे अनेक कुटुंब उध्वस्त होण्याची शक्यता आहे.