Hingoli : आरोग्य व्यवस्थेचा बोजवारा, शस्त्रक्रियेनंतर ४३ महिलांना जमिनीवर झोपवले, हिंगोलीतील धक्कादायक प्रकार

Hingoli Latest Health News : मराठवाड्यात आरोग्य व्यवस्थेचा पूर्णपणे बोजवारा उडाल्याचं पाहायला मिळालं आहे. मराठवाड्यातील हिंगोलीच्या बाळापूर उपजिल्हा रुग्णालयात कुटुंब नियोजन शस्त्रक्रिया पार पडल्यानंतर महिलांना जमिनीवरच झोपवल्याचा संतापजनक प्रकार उघडकीस आलाय. येथील रुग्णालयात कॉट उपलब्ध नसल्याने 43 महिलांना चक्क जमिनीवर झोपविण्यात आल्याचा धक्कादायक आणि संतापजनक प्रकार उघड झाला आहे.

कुटुंब नियोजन शस्त्रक्रिया पार पडल्यानंतर अवघ्या काही मिनिटांमध्येच या महिलांना रूग्णालयात जमिनीवर झोपायला दिले. कडाक्याची थंडी असताना, या महिलांना देखील जमिनीवर झोपवण्यात आल्याने हिंगोलीत संतापजनक प्रतिक्रिया दिल्या जात आहे. रूग्णांच्या नातेवाईकांनी रुग्णालयाच्या विरोधात संताप व्यक्त करत आता कार्यवाई करण्याची मागणी केली आहे.

केंद्र व राज्याच्या आरोग्य यंत्रणेमार्फत सर्वच रुग्णालयात कुटुंब नियोजन शस्त्रक्रियेसाठी टार्गेट देण्यात येत आहेत. हे टार्गेट पूर्ण करण्यासाठी दर दिवशी मोठ्या संख्येने या महिलांना कुटुंब नियोजन शस्त्रक्रिया करण्यासाठी रुग्णालयात एकत्रित बोलवण्यात येतं. मात्र रुग्णालयात पुरेशा सोयी सुविधा उपलब्ध करून दिल्या जात नसल्याची बाब रुग्णालयातील वैद्यकीय डॉक्टरांनी अधोरेखित केली आहे.

बाळापूरच्या आरोग्य अधिकाऱ्यांनी अपुऱ्या सोयी सुविधा संदर्भात कोणतीही माहिती वरिष्ठ अधिकाऱ्यांना कळवली नाही. या संपूर्ण प्रकरणात आपण सखोल चौकशी करणार असल्याची माहिती हिंगोलीचे जिल्हा आरोग्य अधिकारी डॉक्टर कैलास शेळके यांनी दिली आहे. हिंगोलीतील या प्रकरामुळे संतापाची लाट उसळळी आहे. प्रशासनावर टीकेचा भडीमार होत आहे. लोकांमध्ये संतापाचे वातावरण आहे.