Hingoli : डॉक्टरचा माजोरडेपणा, अपघातात जखमी झालेल्या तरुणाच्या उपचारास नकार; हिंगोलीतील संतापजनक घटना

संदीप नागरे, हिंगोली

हिंगोली जिल्ह्यात ग्रामीण भागातील आरोग्यवस्थेचा पुरता बोजवारा उडाल्याचे पाहायला मिळाले आहे. हिंगोली परभणी रस्त्यावर काल रात्री अपघातात जखमी झालेल्या तरुणावर, जवळा बाजार प्राथमिक आरोग्य केंद्रात डॉक्टरांनी चक्क उपचार नाकारल्याचा गंभीर प्रकार पुढे आला आहे.

खाजगी रुग्णवाहिका चालक, पोलीस आणि नागरिक आरोग्य विभागातील डॉक्टर व कर्मचाऱ्यांना उपचार करण्यासाठी विनवणी करत असताना देखील, रुग्णाला इथे उपचाराची गरज नाही हिंगोलीच्या रुग्णालयात घेऊन असे म्हणत प्राथमिक उपचार डॉक्टरांनी नाकारले आहेत. धक्कादायक बाब म्हणजे रक्ताच्या थारोळ्यात असलेला हा जखमी तरुण 35 मिनिट तडफडत असताना डॉक्टर आणि कर्मचारी वाद घालत असल्याचं व्हिडिओमध्ये दिसत आहे.

अखेर हिंगोलीत वरिष्ठ अधिकाऱ्यांना फोन केल्यानंतर या डॉक्टरांनी रुग्णवाहिकेत या तरुणावर थातूरमातूर उपचार करत पुढील उपचारासाठी परभणीच्या शासकीय रुग्णालयात रेफर केले आहे. औंढा पोलिसांनी या अपघातातील धडक देणारे पिकप वाहन ताब्यात घेतले असून जखमी तरुणाची ओळख पटवणे सुरू केले आहे.

या प्रकारामुळे उपचार करणारी आरोग्य यंत्रणा रुग्णांच्या जीवितवास धोका पोहोचवण्यास कारणीभूत ठरत असल्याचे पुढे आले आहे. त्यामुळे राज्याचे आरोग्य मंत्री ढासाळलेल्या ग्रामीण भागातील आरोग्यवस्थेकडे लक्ष देणार का? असा सवाल नागरिक करत आहेत.