वाबळेवाडीचे निलंबित मुख्याध्यापक दत्तात्रय वारे चौकशी समिती समोर हजर

पुणे :- पुणे जिल्ह्यातील शिरूरमध्ये असलेल्या आणि आंतराष्ट्रीय पातळीवर नावारूपास आलेल्या आदर्श जिल्हा परिषद शाळा वाबळेवाडीचे मुख्याध्यापक दत्तात्रय वारे मागील काही दिवसांपासून चर्चेत आहेत. पुणे जिल्हा परिषदेच्या शिक्षण विभागाकडून मुख्याध्यापक दत्तात्रय वारे यांच्यावर कर्तव्यात कसूर केल्याचा ठपका ठेवत हि निलंबनाची कारवाई करण्यात आली आहे.

हे देखील पहा :

वारे यांच्या खात्यामध्ये 30 लाख रुपयांची उलाढाल झाल्याचे रेकॉर्ड जिल्हा परिषदेच्या चौकशी समितीला सापडले आहे. या पार्श्वभूमीवर दत्तात्रय वारे यांना पुणे जिल्हा परिषदेकडून चौकशीसाठी आज बोलावण्यात आले होते. सध्या वारे यांना निलंबित करण्यात आले आहे. या प्रकरणाची चौकशी करणाऱ्या चौकशी समितीसमोर हजर राहून आपली बाजू मांडण्यासाठी आज दत्तात्रय वारे यांना बोलावण्यात आले होते.

दरम्यान, त्यांच्या खात्यात आलेल्या रकमांचे स्पष्टीकरण मागवणारी नोटीसही बजावण्यात आली होती. आपल्यावरील सर्व आरोप वारे यांनी नाकारले आहेत. 650 पानांचे स्पष्टीकरण आपण चौकशी समितीला दिले असून एक पैशाची ही अफरातफर आपल्याकडून झालेली नाही. तसेच पदरमोड करुन आपण शाळा उभारल्याचे वारे यांनी सांगितले आहे. तर त्यांच्याकडून आलेलं स्पष्टीकरण पाहून आपण निर्णय घेऊ असं जिल्हा परिषद सीईओ आयुष प्रसाद यांनी स्पष्ट केलं आहे.

Edited By : Krushnarav Sathe