Chikhaldara Picnic Spot : चिखलदऱ्यात तुफान राडा, पर्यटकांना जिप्सी चालकाची बेदम मारहाण, व्हिडिओ व्हायरल

विदर्भाचे नंदनवन म्हणून ओळखल्या जाणाऱ्या चिखलदऱ्यात पर्यटकांची सध्या मोठ्या प्रमाणात वर्दळ आहे. निसर्गाच्या सान्निध्यात थंड हवामानाचा आनंद घेण्यासाठी अनेक पर्यटक येथे गर्दी करत आहेत. मात्र, या पर्यटन स्थळी घडलेली एक धक्कादायक घटना सध्या चर्चेचा विषय ठरत आहे. चिखलदऱ्यातील प्रसिद्ध पंचबोल पॉईंटवर काही पर्यटक एकत्र येऊन गाण्याचा आनंद घेत होते. याच दरम्यान, गाण्याच्या आवाजावरून पर्यटकांमध्ये वाद झाला. वाद इतका टोकाला गेला की त्यामध्ये जिप्सी चालकांनी हस्तक्षेप करत काही पर्यटकांना मारहाण केली. पर्यटकांना बेदम मारहाण करतानाचा व्हिडिओ सध्या सोशल मीडियावर मोठ्या प्रमाणात व्हायरल होत आहे.

या मारहाणीच्या घटनेनंतरही प्रकरण शांत झाले नाही. जिप्सी चालकांचा एक गट पुन्हा पंचबोल पॉईंटवर जमून त्या पर्यटकांचा पुन्हा पाठलाग करून मारहाण करण्याच्या तयारीत होता. पर्यटकांनी घाबरून जवळच्या झाडीत लपून आपला जीव वाचवण्याचा प्रयत्न केला. या घटनेमुळे पर्यटन स्थळी काही काळ तणावाचं वातावरण निर्माण झालं.

दरम्यान, चिखलदरा पोलिसांना याबाबत माहिती मिळताच एपीआय प्रवीण पाटील यांनी तात्काळ पावले उचलली. आपल्या सहकाऱ्यांसह त्यांनी घटनास्थळी धाव घेत पर्यटकांची सुखरूप सुटका केली. पोलिसांनी प्रकरण गांभीर्याने घेतले असून जिप्सी चालकांविरोधात संबंधित कायदेशीर कारवाई सुरू करण्यात आली आहे.

या घटनेनंतर स्थानिक प्रशासन आणि पोलीस विभागाने पंचबोल पॉईंटसह इतर प्रमुख पर्यटनस्थळी अतिरिक्त बंदोबस्त वाढवण्याचे संकेत दिले आहेत. चिखलदऱ्यासारख्या संवेदनशील पर्यटनस्थळी अशा प्रकारची गुन्हेगारी वृत्तीची घटना घडणे अत्यंत दुर्दैवी मानली जात आहे. पर्यटकांच्या सुरक्षिततेचा प्रश्न पुन्हा ऐरणीवर आला असून, स्थानिक प्रशासनाकडून या घटनेची सखोल चौकशी केली जात आहे.

जिल्हा प्रशासनाने पर्यटन क्षेत्रात कार्यरत स्थानिक वाहनचालक, गाईड व व्यावसायिकांसाठी आचारसंहिताही लागू करण्याचा विचार सुरु केला आहे, जेणेकरून पर्यटकांच्या सुरक्षिततेला धोका निर्माण होणार नाही आणि चिखलदऱ्याचे पर्यटन वैभव टिकून राहील. या घटनेनंतर नागरिकांमध्ये संतापाचे वातावरण असून, पर्यटकांच्या सुरक्षेची हमी देण्यासाठी प्रशासनाने अधिक जबाबदारीने काम करावे, अशी मागणी होत आहे.