Gudi Padwa 2023 : गुढीपाडव्याच्या मुहूर्तावर शाळा प्रवेश, रात्रीपासून पालकांची भली माेठी रांग

- रणजित माजगावकर

Kolhapur : गुढीपाडव्याच्या (Gudi Padwa 2023) शुभ मुहूर्तावर आपल्या मुलाला चांगल्या शाळेत प्रवेश मिळावा यासाठी पालक गुढीपाडव्याच्या दिवशी विविध शाळांमध्ये जाऊन मुलांचा प्रवेश नाेंदवितात अथवा घेतात. कोल्हापुरातील एका शाळेत काल रात्रीपासूनच मुलांचा प्रवेश निश्चित व्हावा यासाठी पालकांची मोठी रांग लागली हाेती.

कोल्हापूर महानगरपालिकेच्या श्रीमती लक्ष्मीबाई कृष्णाजी जरग विद्यामंदिर येथे आज सकाळी काही पालक मुलांच्या ऍडमिशनसाठी आले असता त्यांना अन्य पालकांची मोठी रांग दिसली. हे पाहून पालकांना धक्काच बसला. त्यांनी चाैकशी केली असता रात्रीपासूनच पालकांनी शाळा परिसरात ठिय्या मांडल्याचे समजले.

खरंतर जरग नगर शाळा ही महापालिकेची कोल्हापुरातील सर्वोत्कृष्ट शाळा आहे. याचं शाळेतील अनेक मुले राज्यभरात शिष्यवृत्ती परीक्षेत अग्रक्रमाने येतात. त्यामुळेच या शाळेत ऍडमिशन मिळावं यासाठी अनेक पालक सुरुवातीपासून प्रयत्न करत असतात.

आज गुढीपाडवा असल्याने शाळेची प्रवेश प्रक्रिया सुरू झाली. त्यामुळे रात्रीपासून पालकांनी शाळेच्या परिसरात प्रवेश अर्ज मिळावा यासाठी गर्दी केली हाेती. दरम्यान सकाळच्या सुमारास मोठ्या प्रमाणावर पालकांची गर्दी पाहायला मिळाली आहे.

Edited By : Siddharth Latkar